अर्बुद भएका आधा बालबालिका अस्पतालको पहुँच बाहिर

भरतपुर । चितवनको बिपी कोइराला मोमोरियल अर्बुद अस्पतालले अर्बुद भएका बालबालिकालाई स्टेसनरी सामग्री वितरण गरेको छ । विश्व बाल अर्बुद दिवसका अवसर पारेर बिहीबार अस्पतालमा उपचारत बिरामीलाई स्टेसनरी सामग्री वितरण तथा अभिभावकबीच जनचेतनामूलक कार्यक्रमको आयोजना गरेको हो ।

कार्यक्रममा बाल अर्बुद रोग विशेषज्ञ कृष्णसागर पौडेलले नेपालमा अर्बुद भएका बालबालिका आधाभन्दा बढी अस्पतालबाहिर रहेका बताए । उनका अनुसार, नेपालमा करिब एक हजार पाँच सयजना बालबालिकालाई अर्बुद भएको अनुमान छ । त्यसमध्ये अस्पतालको पहुँचमा आधा रहेको उनले बताए । अस्पताल आउनेमध्ये भरतपुरको बिपी कोइराला अर्बुद अस्पतालमा चार सयको हाराहारीमा आउने उनले बताए ।