३ सय वर्षअघि अर्बौको मालसामानसहित समुन्द्रमा डुबेको जहाज भेटियो, सुनचाँदी गायब

सन् १७०८ मा स्पेनको सान जोस नामको एक जहाज क्यारेबियन सागरमा डुब्यो । त्यो वर्ष अंग्रेज सेनाले स्पेनमाथि आक्रमण गरेको थियो । हमलापछि श्रीसम्पत्ति पनि लुटिने डरले त्यो जहाजमा भरेर स्पेनले अर्बौका मालसामान लुकाउन लैजाँदै थियो ।

अंग्रेज सेनाले यो कुरा थाहा पाइहाले । अनि ८ जुन १७०८ मा उनीहरूले सबै मालसामान लुट्ने उद्देश्यले स्पेनबाट बाहिरिन लागेका सबै जहाजमा आक्रमण गरे, जसमा सान जोस जहाज पनि थियो ।

अंग्रेजहरूले आक्रमण गर्दा सान जोस जहाज क्यारेबियन सागरमा थियो । हमलाका क्रममा जहाजमा आगाे लाग्यो । पतपती धुवाँ उड्न थाल्यो । यो बेला जहाजमा सैनिकहरूसमेत गरी करिब ६ सय मानिस थिए । आगो लागेपछि जहाज समुन्द्रमा डुब्यो । जहाजसँगै त्यसमा सवार सबै मानिस र १४ अर्ब पाउन्ड मूल्यका मालसामान पनि डुब्यो । ती मालसामानमध्ये धेरैचाहिँ सुनचाँदी थिए ।

डुबेपछि जहाजको खोजी खुबै गरियो । तर, भेटिएन । जहाज खोजिनुको सबैभन्दा मुख्य कारण थियो, त्योसँगै डुबेको खजाना ।

करिब तीन सय वर्षपछि जहाज सान जोसलाई खोजकर्ताहरूले भेट्टाए । सन् २०१५ मा कोलम्बिया सरकारले जहाज खोज्ने काम सुम्पियो । यो काम त्यो कम्पनीलाई दिइएको थियो, जसले टाइटानिकको भग्नावशेष खोजेको थियो । समुन्द्री पुरातत्वविदहरू र वुड्स होल ओसनग्रफिक इन्स्टिच्युसनका खोजकर्ताले यसै वर्षको अन्तिममा जहाजकाे भग्नावशेष फेला पारेका छन् ।

सान जोससँगै सबै जहाज कोलम्बिया गइरहेका थिए । सबै जहाजमा सुन, चाँदीजस्ता बहुमूल्य धातु थिए । यो जहाज खोज्ने वैज्ञानिक ओसनाग्रफिक इन्जिनियर जेफ काएलीका अनुसार जहाजमा माया साम्राज्यदेखि ल्याइएका सुन, चाँदी र पन्ना थिए ।

जहाजमा डुबेको समालसामानमा स्पेन र कोलम्बिया दुवैले दाबी गर्दै आएका छन् । स्पेन त्यो सामान आफ्नो भएको बताउँछ भने कोलम्बिया आफ्नो क्षेत्रमा भेटिएकाले त्यो सामानमा आफ्नो हक लाग्ने तर्क गरिरहेको छ ।

तर, अहिलेचाहिँ जहाज मात्र भेटिएको हो । त्योसँगै डुबेको सामान भेटिएको छैन । वैज्ञानिकहरूका अनुसार ती सामान समुन्द्रमा गलेको हुन सक्छ ।

प्रकाशित मिति: आइतबार, कात्तिक २१, २०७८, १६:४५:००