वर्षाको कामना गर्दै कृषकहरू शिव शरणमा

वर्षा नहुँदा चिन्तित बनेको कृषकहरू पानीको माग गर्दै तौलिहवा स्थित तौलेश्वर महादेवको मन्दिरमा पूजापाठ गरेका छन्। धान रोप्ने समयमा बीउ समेत छर्न नपाएर आत्तिएका कृषकहरू पानीको पुकार गर्दै सो मन्दिरमा पुगेका हुन्।

मन्दिरमा दिनहुँ जसो जिल्लाका विभिन्न स्थानबाट हजार बढी भक्तजनहरू पानीको पुकार गर्दै आउने गरेको मन्दिर व्यवस्थापन समितिका अध्यक्ष राम कुमार गुप्ताले बताए। उनले भने,‘प्रायः जसो सोमबारका दिन भीड लाग्ने मन्दिरमा अहिले भने पानीको माग गर्दै दैनिक हजार बढी भक्तजनहरू आउने गरेका छन्।’