फिलिम–लार्केपास पदमार्ग नौ दिन बन्द हुने

गोरखाको चुमनुब्री गाउँपालिकाले फिलिम–लार्केपास पदमार्गअन्तर्गत पर्ने झरना र ड्याम क्षेत्रको खच्चड मार्गमा निर्माण कार्य गर्न नौ दिनसम्म आवतजावत बन्द हुने भएको छ। आर्थिक वर्ष २०८२/०८३ को स्वीकृत वार्षिक योजनाअन्तर्गत पदमार्ग स्तरोन्नति हुने भएकाले गाउँपालिका–३ झरना क्षेत्र र वडा नम्बर ५ को ड्याम क्षेत्रमा नौ दिनसम्म आवतजावत बन्द गरिएको हो।

पदमार्गको काम प्रभावकारी रूपमा सम्पन्न गर्न असार १० गतेदेखि १८ गतेसम्म पदयात्री र खच्चड आवतजावतमा पूर्ण रूपमा बन्द गरिएको चुमनुब्री गाउँपालिकाका प्रमुख प्रशासकीय अधिकृत मनोज लामिछानेले जानकारी दिनुभयो।

पदमार्गको उक्त अवधिमा ह्युम पाइप जडान, रेलिङ निर्माण तथा अन्य संरचनागत सुधारको काम गरिने छ। प्रमुख प्रशासकीय अधिकृत लामिछानेले भन्नुभयो, “निर्माणस्थलमा खच्चड तथा अन्य पदयात्रीको आवतजावत जारी रहँदा काममा अवरोध पुग्ने र दुर्घटनाको जोखिमसमेत बढ्ने भएकाले अस्थायी रूपमा पदमार्ग बन्द गर्नुपरेको हो।”

फिलिम–लार्केपास पदमार्ग मनास्लु क्षेत्र भ्रमण गर्ने स्वदेशी तथा विदेशी पर्यटकका लागि महत्त्वपूर्ण पदमार्गका रूपमा परिचित छ। स्थानीय बासिन्दा, व्यापारी तथा ढुवानी व्यवसायीहरूले दैनिक उपभोग्य सामग्री तथा अन्य सामान ओसारपसारका लागि यही मार्ग प्रयोग गर्दै आएका छन्।

पदमार्ग बन्द अवधिमा सम्बन्धित सबै पक्षलाई आवश्यक व्यवस्थापन गर्न गाउँपालिकाले आग्रहसमेत गरेको छ। पालिकाले निर्माण कार्य सम्पन्न भएपछि पदमार्ग अझ सुरक्षित, व्यवस्थित र यात्रीमैत्री बन्ने विश्वास व्यक्त गरेको छ। पदमार्ग स्तरोन्नतिले स्थानीय बासिन्दा तथा पर्यटक दुवैलाई दीर्घकालीन रूपमा लाभ पुग्ने अपेक्षा गरिएको छ।

गाउँपालिकाका प्रमुख प्रशासकीय अधिकृत मनोज लामिछानेद्वारा मङ्गलवार हस्ताक्षरित सूचनामा सार्वजनिक निर्माण कार्यमा सहयोग गर्न तथा निर्माण कार्य अवधिभर वैकल्पिक पैदल मार्ग प्रयोग गर्न अनुरोध गरिएको छ।

गाउँपालिकाले निर्धारित समयभित्र काम सम्पन्न गरी पदमार्ग पुनः सञ्चालनमा ल्याउने बताउँदै मनास्लु पदमार्ग यात्रा गर्ने यात्रीहरू र स्थानीय बासिन्दासँग बाध्यतावश पदमार्ग बन्द गर्नुपरेकोमा क्षमायाचनासमेत गरेको छ।