"जनकपुर उच्च अदालतको ऐतिहासिक कदम, अब सुनुवाइ युट्युबमार्फत प्रत्यक्ष प्रसारण सुरु"

उच्च अदालत जनकपुरले न्यायिक प्रक्रियामा पारदर्शिता र नागरिकको पहुँच विस्तार गर्ने उद्देश्यसहित अदालतका सुनुवाइहरू युट्युबमार्फत प्रत्यक्ष प्रसारण (लाइभ स्ट्रिमिङ) सुरु गरेको छ।

अदालतले गोप्य प्रकृतिका तथा बन्द इजलासमा सञ्चालन हुने मुद्दाबाहेक अन्य सुनुवाइहरू प्रत्यक्ष प्रसारण गर्ने व्यवस्था लागू गरेको जनाएको छ। यस कदमसँगै सर्वसाधारणले अदालतमा भइरहेको सुनुवाइलाई डिजिटल माध्यमबाट प्रत्यक्ष रूपमा हेर्न सक्ने भएका छन्।

न्यायपालिकामा सूचना प्रविधिको प्रयोग बढाउँदै न्यायिक प्रक्रियालाई थप पारदर्शी, उत्तरदायी र जनमैत्री बनाउने उद्देश्यले यो अभ्यास सुरु गरिएको अदालत स्रोतले जनाएको छ। प्रत्यक्ष प्रसारणको व्यवस्थाले न्याय सम्पादन प्रक्रियाप्रति नागरिकको विश्वास अभिवृद्धि हुनुका साथै न्यायालयका गतिविधिप्रति जनचासो र निगरानी समेत बढ्ने अपेक्षा गरिएको छ।

नेपालको न्यायपालिका पछिल्ला वर्षहरूमा डिजिटल रूपान्तरणतर्फ अग्रसर रहँदै आएको छ। यसअघि सर्वोच्च अदालतले पनि सुनुवाइको प्रत्यक्ष प्रसारणसम्बन्धी अभ्यास अघि बढाएको थियो। सोही क्रममा उच्च अदालत जनकपुरले समेत प्रत्यक्ष प्रसारणको व्यवस्था लागू गर्दै न्यायिक सेवामा प्रविधिको प्रयोगलाई थप विस्तार गरेको हो।

कानुन व्यवसायी, अधिकारकर्मी तथा सर्वसाधारणले अदालतको यो कदमलाई न्यायिक पारदर्शिता प्रवर्द्धन गर्ने महत्वपूर्ण पहलका रूपमा लिएका छन्। यस व्यवस्थाले अदालतका कामकारबाहीलाई थप खुला, जवाफदेही र नागरिकमैत्री बनाउन सहयोग पुग्ने विश्वास व्यक्त गरिएको छ।