होल्डिङ सेन्टर खाली गर्न पाँच दिनको समय, प्रभावित परिवारलाई २५ हजार रुपैयाँ राहत

बागमती सभ्यता एकीकृत विकास समितिले काठमाडौं उपत्यकाका नदी किनारबाट हटाइएका जोखिमयुक्त बस्तीका प्रभावित परिवारलाई २५ हजार रुपैयाँ पुनर्स्थापना खर्च उपलब्ध गराउने भएको छ ।

समितिले जारी गरेको सूचनाअनुसार १२, १३, १८, १९ र २० वैशाखमा हटाइएका बस्तीका दशरथ रंगशालास्थित शिविरमा दर्ता भएका परिवारले तोकिएको ढाँचामा निवेदन दिएपछि राहत रकम सम्बन्धित व्यक्तिको बैंक खातामा पठाइनेछ ।

घरभाडाबापतको रकम मासिक किस्तामा सोही खातामा उपलब्ध गराइने जनाइएको छ । पुनर्स्थापना रकम वितरणपछि शिविर बन्द गरिने भएकाले प्रभावित परिवारलाई सूचना प्रकाशित भएको मितिले पाँच दिनभित्र स्वव्यवस्थापन गरी शिविर खाली गर्न आग्रह गरिएको छ ।

रकम प्राप्त नभएमा कार्यालय समयमा अधिकार सम्पन्न बागमती सभ्यता एकीकृत विकास समितिको कार्यालयमा सम्पर्क गर्न सूचनामा उल्लेख छ ।

प्रकाशित मिति: मंगलबार, असार ९, २०८३

१५:०२