गण्डकीमा राइड सेयरिङको न्यूनतम भाडा निर्धारण

पोखरा । राइड सेयरिङलाई नियमावली बनाएर वैधता दिएको गण्डकी सरकारले यो सेवा दिने सवारीको भाडा पनि तोकेको छ ।

भौतिक पूर्वाधार विकास तथा यातायात व्यवस्था मन्त्रालयले सवारीको प्रकार अनुसारको भाडादर सार्वजनिक गरेको हो ।

मन्त्रालयले हालै उक्त राइड सेयरिङ नियमन र व्यवस्थापन नियमावलीलाई दोस्रोपटक संशोधन गरेको थियो । सोही संशोधित नियमावलीको नियम १९ अनुसार मन्त्रालयले जेठ ११ गते मन्त्रीस्तरीय निर्णयबाट भाडादर तोकेको हो ।

मन्त्रालयको सूचनाअनुसार सेवाग्राहीले राइड सेयर सेवामा चारपांग्रे सवारी साधनको प्रयोग गर्दा चढ्नासाथ सुरुवाती भाडा ६० रुपैयाँ तिर्नैपर्नेछ । त्यसपछि प्रति दुई किलोमिटर ९७ रूपैयाँ तिर्नुपर्ने छ ।

मन्त्रालयले सूचनामा आधारभूत भाडा पनि राखेको छ । “सुरुवाती भाडा र प्रति दुई किमी बराबर आधार भाडा हुनेछ । जतिसुकै कम दूरीको यात्रा भए पनि दुई किमी बराबरको भाडा आकर्षित हुनेछ । (६०+९७=१५७) ।”

यदि कोही यात्रुले १० किलोमिटर चारपांग्रेबाट यात्रा गर्‍यो भने उसले ५४५ रुपैयाँ तिर्नुपर्छ । राइड सेयरिङमार्फत चारपांग्रेबाट गन्तव्य दूरी अधिकतम ५० किलोमिटरसम्म सेवा लिन पाइन्छ । सुरुमा यो दूरी २० किलोमिटर राखिएको थियो ।

चारपांग्रे सवारीमा यो दर भने पेट्रोल इन्जिन सवारीको हो । सरकारले नियमावलीबाट नै ट्याक्सीलाई यो सुविधा सहजै दिएको छ । अन्य चारपांग्रेको हकमा भने नियमावली मौन छ ।

सरकारले तोकेको यो भाडादरमा भने १० देखि १५ प्रतिशतसम्म छुट दिनुपर्ने हुन्छ । मन्त्रालयको सूचनामा पेट्रोलियम पदार्थबाट सञ्चालन हुने सवारीले १० र विद्युतीय सवारीले १५ प्रतिशतसम्म छुट दिनुपर्ने हुन्छ ।

सरकारले सेवा प्रदायकलाई एपमा नै दुई किलोमिटरपछि हरेक किलोमिटरको भाडा देखिनेगरि व्यवस्था गर्ने र अन्य कुनै शुल्क जोड्न नपाउने व्यवस्था गरेको छ । मन्त्रालयकी प्रवक्ता उपसचिव मुना अधिकारीले जारी गरेको सूचनाअनुसार दुइपांग्रे सवारीमा पनि पेट्रोलियम पदार्थबाट चल्ने सवारीले १० र विद्युतीय सवारीले १५ प्रतिशत छुटको व्यवस्था गर्नुपर्छ ।

सरकारले दुइपांग्रेको सुरुवाती मूल्य ३० कायम गरेको छ भने प्रतिकिलोमिटर १६ रुपैयाँ ५० पैसा भाडा तोकेको छ । दुइपांग्रेको सुविधा लिँदा दुई किलोमिटर आधार भाडा जोड्दा यात्रुले ४६ रुपैयाँ ५० पैसा तिर्नैपर्ने हुन्छ ।यो भन्दा कम मूल्य एपमा नै देखाउँदैन।

#गण्डकी

#राइड सेयरिङ