चेर्दुङलाई चिनाउँदै लामाको मनमोहक फोटो प्रदर्शनी

काठमाडौं : दोलखाको रमणीय पर्यटकीय गन्तव्य चेर्दुङको प्रचारप्रसार गर्ने उद्देश्यले फोटो पत्रकार जीवन लामाले खिचेका आकर्षक तस्बिरहरूको प्रदर्शनी काठमाडौंमा सुरु भएको छ। नयाँ बानेश्वरस्थित उमोजा कफी मा बिहीबारदेखि सुरु भएको ‘चेर्दुङ पदयात्राका तस्बिरहरू’ शीर्षकको तीन दिने प्रदर्शनीले चेर्दुङको प्राकृतिक, सांस्कृतिक तथा धार्मिक महत्वलाई उजागर गरेको छ।

एक्सप्लोर नेपाल नेटवर्कद्वारा आयोजित प्रदर्शनीमा ३१ वटा तस्बिर समावेश छन्। तस्बिरहरूमा गौरीशंकर हिमशृंखला, जिरी उपत्यका, झ्याँकु गाउँ, स्थानीय संस्कृति, साइक्लिङ, पदयात्रा तथा हिमाली जीवनशैलीका जीवन्त दृश्य समेटिएका छन्। प्रदर्शनीको उद्घाटन पर्यटनविज्ञ तथा विश्व पर्वतारोहण महासंघका मानार्थ विज्ञ दूत आङछिरिङ शेर्पाले गरेका थिए। उनले फोटो प्रदर्शनीले चेर्दुङलाई अन्तर्राष्ट्रिय स्तरसम्म चिनाउन महत्त्वपूर्ण भूमिका खेल्ने विश्वास व्यक्त गरे।