छानबिन समितिका प्रतिवेदन सार्वजनिक गर्न कांग्रेस सांसद केरुङको माग

काठमाडौँ । नेपाली कांग्रेसका सांसद नरेन्द्रकुमार केरुङले सरकारले विभिन्न घटनाको छानबिन गर्न गठन गरेका आयोग तथा अध्ययन समितिका प्रतिवेदनहरू तत्काल सार्वजनिक गर्न माग गरेका छन्।

प्रतिनिधि सभाको विशेष समयमा बोल्दै सांसद केरुङले नेपालमा गम्भीर घटनापछि छानबिन समिति बनाउने र प्रतिवेदन दराजमा थन्क्याउने पुरानो संस्कार अझै अन्त्य नभएको बताएका छन्। वर्तमान सरकारले गठन गरेका १० वटा आयोगमध्ये कतिपय प्रतिवेदन बुझ्न बाँकी रहेको, कतिपय बुझेर पनि कार्यान्वयन नभएको र कतिपय सार्वजनिक नगरिएको उल्लेख गर्दै उनले विशेषगरी गृहमन्त्रीको सम्पत्ति र सेयर लगानीसम्बन्धी पूर्वन्यायाधीश अच्युतप्रसाद भण्डारी नेतृत्वको समितिको प्रतिवेदन सार्वजनिक गर्न माग गरेका छन्।