‘प्रदेश मन्त्री निवासमा छापा मार्ने प्रहरीमाथि कारबाही प्रक्रिया सुरु’

विराटनगर । कोशी प्रदेशका आन्तरिक मामिला तथा कानुन मन्त्री इन्द्रमणि पराजुलीले आफ्नो सरकारी निवासमा प्रहरी प्रवेश गरेको घटनाबारे मंगलबारको प्रदेशसभा बैठकलाई जानकारी दिएका छन् । उनले घटनाको विवरण प्रस्तुत गर्दै यस कार्यमा संलग्न प्रहरीमाथि कारबाही प्रक्रिया अघि बढिसकेको जानकारी गराएका हुन् ।

आफू विपद् व्यवस्थापन सम्बन्धी पूर्वतयारी बैठकका लागि जिल्ला बाहिर रहेका बेला विराटनगर–१, पुष्पलाल चोकस्थित आफ्नो भाडाको आवासमा प्रहरीले छापा मारेको बताए । ‘म सङ्खुवासभा र तेह्रथुममा मनसुनजन्य विपद् प्रतिकार्य योजना र पूर्वतयारी सम्बन्धमा जिल्लाहरूले आयोजना गरेको बैठकमा सहभागी हुन असार ४ गते दिउँसो ४ बजे नै विराटनगरबाट धनकुटा प्रस्थान गरेको थिएँ । म धनकुटामै रहेको समयमा असार ४ गते राति ८ः४५ बजेको समयमा यो घटना भएको हो,’ उनले भने ।