जलवायु निगरानीका लागि दुई उपग्रह प्रक्षेपण

जलवायु परिवर्तनका कारण बढिरहेका चरम मौसमी घटनाको प्रभाव र पृथ्वीको वातावरणीय अवस्था निगरानी गर्न युरोपेली अन्तरिक्ष एजेन्सी (इएसए) ले दुई पृथ्वी अवलोकन उपग्रह सफलतापूर्वक कक्षामा पठाएको छ ।

फ्रान्सेली गुयानास्थित कौरौ अन्तरिक्ष केन्द्रबाट सोमबार राति ‘वेगा–सी’ रकेटमार्फत ‘फ्लेक्स’ र ‘सेन्टिनेल–३ सी’ उपग्रह प्रक्षेपण गरिएको हो । प्रक्षेपणको करिब दुई घण्टापछि दुवै उपग्रहलाई सूर्यसँग समकालिक कक्षामा स्थापित गरिएको एएफपीले जनाएको छ ।