बालेनलाई गाडी दिने व्यापारीको बयानका आधारमा विष्णु पौडेल पक्राउ !

काठमाडौं । व्यवसायीद्वय कमलकिशोर मालपानी र चुन्नप्रसाद शर्माको बयानपछि पूर्वअर्थमन्त्रीसमेत रहेका नेकपा एमालेका उपाध्यक्ष विष्णुप्रसाद पौडेल पक्राउ परेको खुलेको छ । उनीहरूले पौडेलकै दबाबका कारण आफूहरूले श्रीराम टोबाकोको सेयर व्यवसायी दीपक भट्टलाई सस्तोमा बेचेको बयान दिएका थिए ।

सम्पत्ति शुद्धीकरण अनुसन्धान विभागले विशेष अदालतलाई गत जेठमा व्यवसायीहरू कमलकिशोर मालपानी र चुन्न प्रसाद पौडेललाई सोधपुछ गरि बयान लिइएको जानकारी गराएको थियो । त्यसपछि विशेष सरकारी वकिल कार्यालयले भट्टसहित ३९ जनाविरूद्ध सम्पत्ति शुद्धीकरणको मुद्दा अभियोजन गरिएको थियो ।

हाल विभागले यो मुद्दामा पुरक अभियोजन लैजाने तयारी गरेको छ । खासगरी व्यवसायी भट्टको साझेदार देखिएका व्यवसायीहरू विभागको राडारमा छन् । उनै व्यवसायीको बयान पछि पौडेल पक्राउ परेको पाइएको छ ।

सम्पत्ति शुद्धीकरण अनुसन्धान विभागको पत्रका आधारमा सुर्खेतबाट पक्राउ परेका पूर्वअर्थमन्त्री एवं एमाले उपाध्यक्ष विष्णु पौडेललाई म्याद थपका लागि विशेष अदालतमा पेस गरिएको छ । उनीमाथि थप अनुसन्धानका लागि सरकारी वकिलको कार्यालयले २० दिनको म्याथ थप गर्न इजलास समक्ष माग गरेको छ ।

व्यवसायी दीपक भट्ट लगायतसँग मिलेर सेयर कारोबार र अवैध सम्पत्ति आर्जन गरेको आरोपमा उनीमाथि थप अनुसन्धान आवश्यक रहेको सरकारी वकिलहरूले तर्क गरेका थिए ।

पौडेलका तर्फबाट बहस गरेका कानुन व्यवसायीहरूले राजनीतिक पूर्वाग्रहका आधारमा पक्राउ गरिएको र उनको आरोप पुष्टी नहुने भएकाले म्याद थप गर्न आवश्यक नभएको तर्क गरे ।

शर्मा र मालपानीले श्रीराम टोबाकोको २० प्रतिशत सेयर भट्टलाई बेच्दा पौडेलले सहजीकरण गरेको दलिल सरकारी वकिलले इजलास समक्ष गरेका थिए । मालपानी र शर्माको सोही बयानका आधारमा आधारमा पौडेललाई पक्राउ गर्न नमिल्ने तर्क पौडेल पक्षका कानुन व्यवसायीको छ ।

‘प्रश्न उठाउने नै हो भने मालपानी भन्ने व्यक्तिले कसलाई गाडी दिएका थिए चुनावमा ?’ उनीमाथि गर्नु पर्ने कानुन व्यवसायीको भनाइ छ ।

‘मालपानीको गाडी कसले प्रयोग गर्‍यो उसलाई समाउनु पर्‍यो जसले ८ करोडको मालपानीको गाडी चढ्छ त्यसमाथि अनुसन्धान नहुने ?,’ इजलास समक्ष पौडेलका कानुन व्यवसायीले भने, ‘मालपानीले मेरो कम्पनीको सेयर फलानोले कम रकममा किन्यो भनेकै आधारमा विष्णु पौडेललाई पक्रन मिल्छ ?’