बजेटमा सांसद असन्तुष्ट, लुम्बिनी प्रदेश सभा बैठक सर्‍यो

बुटवल । बजेटप्रति सांसदहरूले असन्तुष्टि जनाएपछि प्रदेश सरकारले दलहरूबिच छलफल र सहमति जुटाउन समय माग गरेको छ ।

सरकारको आग्रहपछि लुम्बिनी प्रदेश सभाको बैठक भोलिसम्मका लागि स्थगित गरिएको छ ।

मंगलबार दिउँसो ३ बजे बसेको प्रदेश सभाको आठौँ अधिवेशनअन्तर्गतको दशौँ बैठकमा आगामी आर्थिक वर्ष २०८३/०८४ को बजेटमाथि सैद्धान्तिक छलफल सुरु भएको थियो । छलफलका क्रममा प्रतिपक्षसँगै सत्ता पक्षका केही सांसदहरूले समेत बजेटप्रति असन्तुष्टि व्यक्त गर्दै विरोध जनाएका थिए । त्यसपछि बैठक प्रारम्भिक रूपमा आधा घण्टाका लागि स्थगित गरिएको थियो ।

पछि बैठक पुनः सञ्चालनका लागि प्रदेश सरकारले दलहरूबिच सहमति जुटाउन थप समय आवश्यक रहेको जनाउँदै समय माग गरेपछि सभामुखको निर्देशनमा बैठक बुधबार असार १० गते दिउँसो १ बजे बस्नेगरी स्थगित गरिएको प्रदेश सभा सचिवालयले जनाएको छ ।

सचिवालयद्वारा जारी सूचनामा प्रदेश सरकारबाट सहमति जुटाउन समय माग भएकाले पूर्वनिर्धारित कार्यसूचीअनुसार आगामी एघारौँ बैठक असार १० गते बुधबार दिउँसो १ बजे बस्ने गरी तय गरिएको उल्लेख गरिएको छ । उक्त सूचना लुम्बिनी प्रदेश सभा नियमावली, २०७९ को नियम १२ को उपनियम (३०) बमोजिम प्रकाशन गरिएको जनाइएको छ ।

यसअघि सोमबार बस्ने तय भएको प्रदेश सभा बैठक सांसदहरूले बजेटसँग सम्बन्धित ‘रातो किताब’ अध्ययन गर्न पर्याप्त समय नपाएको भन्दै स्थगित गरिएको थियो । सो बैठक मंगलबारका लागि सारिएको भए पनि आजको बैठकमा बजेटप्रति असन्तुष्टि जनाउँदै प्रतिपक्ष तथा सत्ता पक्षका केही सांसदहरूले विरोध गरेपछि बैठक पुनः स्थगित भएको हो ।