कृष्णभीरको अस्थायी सडक दीर्घकालीन समाधान होइन, सुरुङ वा वैकल्पिक संरचना आवश्यक [भिडियो]

काठमाडौँ बाढीपहिरोका कारण क्षतिग्रस्त पृथ्वी राजमार्गअन्तर्गत धादिङको कृष्णभीर खण्डमा सडक विभागले असोज १ गतेदेखि दुईतर्फी सवारी सञ्चालन गर्ने तयारी गरिरहेका बेला भू–प्राविधिक विज्ञहरूले भने हाल बनाइँदै गरेको अस्थायी सडकलाई दीर्घकालीन समाधानका रूपमा लिन नहुने बताएका छन्।

बाढीले सडकको तल्लो भाग कटान गरेपछि माथिल्लो भागको पाखो काटेर अस्थायी सडक निर्माण गरिएको छ। सडक विभागले तत्काल यातायात सहज बनाउन यो विकल्प अघि बढाए पनि भू–प्राविधिक इन्जिनियर उदयराज न्यौपानेले कृष्णभीरको भूभाग सामान्य चट्टानी नभई नदी तथा पहिरोले थुपारेको पदार्थमाथि रहेको बताउँदै गम्भीर जोखिम औल्याएका छन्।