‘सपना नदेखेको धेरै रात भयो’

‘तीजको लहर आयो बरिलै….’ गीतमा नृत्य गरेको टिकटक भिडियो मेरो ह्वाट्स एपमा शेयर गर्दै ‘के छ सितु’ भनेर म्यासेज आयो । कयौं दिनदेखि टिकटक, फेसबुक, इन्टाग्रामबाट म हराएको थिएँ । उसको लिंक क्लिक गर्दा म पुन टिकटक एप्समा जोडिएँ । एकैछिन स्क्रोल गर्न मन लाग्यो । तीज त काठमाडौंतिर छपक्कै लागिसकेछ ।

अघिल्ला वर्षहरूमा एक हप्ता अगाडिदेखि नै तीज लाग्थ्यो । साथीसंगी, आफन्त, परिवारजनलाई दर खान बोलाउने र जाने क्रम निकै अगाडिदेखि सुरु हुन्थ्यो । त्यहाँ भेटघाट, सुखदुःख साटासाट, मन माझामाझ हुन्थ्यो । महिलाहरूका लागि नयाँ साडी, गहनासँगै हैसियत देखाउने महत्वपूर्ण अवसर बन्थ्यो, तीज । तीज सँधै सामान्य रूपमा आउँथ्यो, जान्थ्यो । तर, यसपटकको तीज भने असामान्य बन्यो ।