धनुषामा १५ महिनाका बालकको अपहरणपछि ११ दिनमा उद्धार, महिला पक्राउ

धनुषा। धनुषाको विदेह नगरपालिका–६, तीनकौरियाबाट हराएका १५ महिनाका बालक सिद्धान्त महतोलाई प्रहरीले ११ दिनपछि सकुशल उद्धार गरेको छ। बालकलाई अपहरण गरी नेपाल तथा भारतका विभिन्न स्थानमा लुकाउँदै राखेको आरोपमा प्रहरीले एक महिलालाई समेत पक्राउ गरेको छ।

जिल्ला प्रहरी कार्यालय धनुषाका अनुसार भदौ १८ गते अपराह्न करिब ४: ४० बजे कमलेश महतोका १५ महिनाका छोरा सिद्धान्त घरको आँगनमा खेलिरहेका बेला हराएका थिए। बालक हराएको सूचना प्राप्त भएपछि प्रहरी टोली तत्काल परिचालन गरी खोजतलास सुरु गरिएको थियो।