लिङ्देनलाई राप्रपाकै बागमती संसदीय दलको चुनौतिः हामी बिकेको प्रमाण देखाउनुस्

हेटौँडा । राष्ट्रिय प्रजातन्त्र पार्टी (राप्रपा) को बागमती प्रदेश संसदीय दलले पार्टी अध्यक्ष राजेन्द्रप्रसाद लिङ्देनले निर्वाचित प्रदेश सांसदहरूमाथि गरेको कारबाही र सार्वजनिक रूपमा व्यक्त गरेका अभिव्यक्तिप्रति गम्भीर आपत्ति जनाएको छ । बागमती प्रदेश सभा संसदीय दलको कार्यालय, हेटौँडाबाट जारी गरिएको संयुक्त प्रेस वक्तव्यमार्फत दलका नेता, उपनेता र सचेतकसहितका सांसदहरूले अध्यक्षको विरोध गरेका हुन् ।

संसदीय दलले निर्वाचित सांसदहरू कुनै पार्टी अध्यक्षको व्यक्तिगत सम्पत्ति नभएको उल्लेख गर्दै हजारौँ मतदाताको मतबाट चुनिएका जनप्रतिनिधिको राजनीतिक तथा व्यक्तिगत प्रतिष्ठामाथि प्रहार गर्ने अधिकार कसैलाई नभएको बताएको छ । अध्यक्ष लिङ्देनले आफ्नै पार्टीका निर्वाचित सांसदहरूलाई लक्षित गरी ‘अर्को पार्टीसँग बिकेको’ र ‘अर्काको ओछ्यान तताएको’ जस्ता अपमानजनक र चरित्रहत्या गर्ने शब्द प्रयोग गरेको भन्दै वक्तव्यमा त्यसको कडा भर्त्सना गरिएको छ।