समाजवादी कम्युनिस्ट पार्टी नेपालको महासचिवमा अशोक सुवेदी चयन

काठमाडौँ । समाजवादी कम्युनिस्ट पार्टी नेपालको एकता राष्ट्रिय भेलाले अशोक सुवेदीलाई महासचिवमा चयन गरेको छ । पार्टीका निवर्तमान महासचिव पूर्णबहादुर सिंहले विचार र संस्कृति दुवैको रक्षा गर्न नसकेको ठहर गर्दै भेलाले उनलाई हटाएर सुवेदीको नेतृत्वमा नयाँ कार्यसमिति चयन गरेको हो ।

भेलाका निर्णय सार्वजनिक गर्न मंगलबार काठमाडौँमा आयोजित पत्रकार सम्मेलनमा महासचिव सुवेदीले नेपालमा क्रान्ति अझै बाँकी रहेको र बलमा टिकेको सत्तालाई बल प्रयोगबाटै परिवर्तन गरिने बताए । उनले यसअघिको नेतृत्वले सर्वहारा वर्ग, सर्वहारा अधिनायकत्व, बल प्रयोग र वैज्ञानिक समाजवाद जस्ता आधारभूत सिद्धान्त परित्याग गरी साम्राज्यवादसँग आत्मसमर्पण गरेकाले बहुमत नेतृत्वले कारबाही गरी पार्टीको नीति र सिद्धान्तको रक्षा गरेको दाबी गरे ।