इरानी फुटबल टोलीलाई अमेरिका प्रवेशमा सहजता, इजिप्टसँगको खेलका लागि दुई दिनअघि आउन पाउने

काठमाडौँ । अमेरिकाको ट्रम्प प्रशासनले फिफा विश्वकप २०२६ को समूह चरणको अन्तिम खेलका लागि इरानी राष्ट्रिय फुटबल टोलीलाई लगाइएको प्रतिबन्धमा अस्थायी रूपमा खुकुलो गरेको छ । इरानले इजिप्टविरुद्ध हुने आफ्नो निर्णायक खेलका लागि खेल हुनुभन्दा दुई दिन अगाडि नै अमेरिका प्रवेश गर्न अनुमति पाएको हो ।

अमेरिकी गृह सुरक्षा विभागका अनुसार यस निर्णयले इरानी टोलीको अमेरिका बसाइलाई एक दिन थप गरेको छ । ‘जुन २६ मा सियाटलमा हुने इरानको तेस्रो खेलका लागि टोलीलाई दुई दिनअघि नै अमेरिका आउन अनुमति दिइएको छ,’ विभागका प्रवक्ताले अल जजीरालाई भने । यद्यपि, टोलीले खेल सकिएकै दिन अमेरिका छाड्नुपर्ने प्रावधानलाई भने यथावत राखिएको छ ।

यो निर्णय वासिङ्टन र तेहरानबिच पछिल्लो समय जारी युद्धविराम सम्झौता र कूटनीतिक वार्ताका कारण घटेको तनावका बिच आएको हो । यद्यपि विभागले प्रतिबन्ध खुकुलो पार्नुको पछाडि कुनै विशेष कारण भने खुलाएको छैन ।

विभागका प्रवक्ताका अनुसार टोलीको बसाइमा एक दिन थप गरिए पनि सुरक्षाका मापदण्ड र प्रोटोकलहरूमा कुनै परिवर्तन गरिएको छैन । ‘इरानी टोलीले खेल सकिएकै दिन फर्कनुपर्नेछ । समग्र सुरक्षा उपाय र प्रोटोकलहरू पहिलेकै जस्तै रहनेछन्,’ प्रवक्ताले थपे, ‘हामी खेलाडी, कर्मचारी र प्रशंसकहरूका लागि सुरक्षित प्रतियोगिता सुनिश्चित गर्न प्रतिबद्ध छौँ। ’