कोरला नाकाबाट भित्रिएका ईभीबारे छानबिन गर्न समिति गठन

उपल्लो मुस्ताङको लिजी–नेचुङ (कोरला) नाकाबाट भित्रिएका विद्युतीय सवारीसाधनमा प्रज्ञापनपत्रमा त्रुटि तथा राजस्व छलीको आशङ्का सम्बन्धमा छानबिन गर्न सरकारले समिति गठन गरेको छ।

सशस्त्र प्रहरी बल नेपालले मुस्ताङ, म्याग्दी, पर्वत र कास्की क्षेत्रबाट नियन्त्रणमा लिएका ७ सय ७५ वटा विद्युतीय (ईभी) सवारीसाधनको विस्तृत अनुसन्धानका लागि प्रधानमन्त्री तथा मन्त्रिपरिषद्को कार्यालयको विशेष निर्देशनमा अर्थ मन्त्रालय, भन्सार विभाग, नेपाल प्रहरी र सशस्त्र प्रहरी बलका प्रतिनिधिहरू सम्मिलित संयुक्त छानबिन समिति गठन गरिएको हो।

समितिले सम्बन्धित भन्सार कार्यालयसम्म पुगेर तीव्र गतिमा अनुसन्धान गरी प्रतिवेदन पेस गर्नेछ। राजस्व छलीको आशङ्का र विशेष सूचनाका आधारमा मुस्ताङको कोरला नाकाबाट भित्रिएका तथा नुवाकोटको पासाङल्हामु राजमार्ग र धादिङको आदमघाटबाट पनि दुईवटा स्थानमा नियन्त्रणमा लिइएका विद्युतीय सवारीसाधनसमेत अनुसन्धानको दायरामा रहेका छन्। सशस्त्र प्रहरी बलका प्रवक्ता विष्णुप्रसाद भट्टले ती ईभी राखिएका स्थानमा सुरक्षा व्यवस्था मिलाइएको जानकारी दिनुभयो।

सरकारी समितिले भन्सार कार्यालयसम्म पुगेर विस्तृत अनुसन्धान गर्नेछ। भन्सार जाँचपासपछि ती सवारीसाधन सदरमुकाम जोमसोम तथा जोमसोम–बेनी–पोखरा सडकखण्ड हुँदै लैजाने क्रममा नियन्त्रणमा लिइएको थियो। सशस्त्र प्रहरीका अनुसार भन्सारबाट छुटेपछि विशेष सूचनाका आधारमा निगरानी बढाइएको हो।

कोरला नाकाबाट करिब १४ किलोमिटर तल रहेको भन्सार कार्यालयमा जाँचपासपछि ती सवारीसाधन १८६ किलोमिटर दूरीको कोरला–जोमसोम–बेनी सडकखण्ड हुँदै पोखरा लैजाने क्रममा विगतमा पनि कागजातसहित ‘क्रस–चेक’ गरिँदै आएको थियो। गत माघयता १८ वटा ईभी भित्रिए पनि जेठ महिनामा मात्रै ठुलो सङ्ख्यामा सवारीसाधन भित्रिएकाले राजस्वमा गडबडी भएको आशङ्का गरिएको छ।