मुस्ताङको जलवायु सम्मेलन र स्थानीय सरकारको भूमिका

पालिकाहरू सक्रिय हुँदा नै जलवायु परिवर्तनको अनुकूल प्रभावकारी हुन्छ। प्रतिकार्य र उद्धार प्रभावसिद्ध हुन्छ। संघले समेत यो कुरा विचार गरी पालिकाहरूसँग समन्वय र सहकार्य गर्न आवश्यक छ। यी सबै कुरामा देशभरबाट भेला भएका जनप्रतिनिधिले अनुभव आदानप्रदानसहित मुस्ताङ घोषणापत्र जारी गरी देशभित्र, बाहिरको ध्यानाकर्षण गराउन जरुरी छ।

जलवायु परिवर्तनको प्रभाव र जोखिम न्यूनीकरणका विषयमा देशभरका पालिकाका प्रतिनिधि मुस्ताङमा जुटेका छन्। चार सयभन्दा बढी पालिकाका प्रतिनिधिहरूको सहभागितामा सम्मेलन हुनु र त्यो पनि मुस्ताङमै हुनुको खास अर्थ छ। त्यो किनभने एक त मुस्ताङ आफैंमा जलवायु परिवर्तनको जोखिमको ठाउँ हो, त्यहीं सम्मेलन हुनुले एउटा सन्देश गएको छ। र, जलवायु परिवर्तनको प्रभाव र जोखिममा सबैभन्दा काम गर्न सक्ने भनेका स्थानीय सरकार हुन्।