ढोरपाटन नगरपालिकाको बजेट ६२ करोड ७० लाख

ढोरपाटन नगरपालिकाले आगामी आर्थिक वर्ष २०८३/०८४ का लागि ६२ करोड ७० लाख ६६ हजारको बजेट ल्याएको छ । नगर उप–प्रमुख धनबहादुर कायतले मंगलबार नगरसभाको बैठकमा बजेट प्रस्तुत गर्नुभएको हो ।

विनियोजित कुल बजेटमध्ये चालुतर्फ ४४ करोड ६२ लाख ६६ हजार २ सय रुपियाँ र पुँजीगततर्फ १८ करोड ८ लाख रुपियाँ प्रस्ताव गरिएको छ ।

नगरपालिकाले आगामी आर्थिक वर्षका लागि आवश्यक स्रोत विभिन्न सरकारी अनुदान, राजस्व बाँडफाँड र आन्तरिक आयबाट जुटाउने अनुमान गरेको छ ।

बजेटका मुख्य स्रोतमा सङ्घीय सरकारबाट प्राप्त हुने वित्तीय समानीकरण अनुदान १० करोड ७३ लाख, सशर्त अनुदान २८ करोड ४० लाख ९६ हजार २ सय, समपूरक अनुदान (फोहोर व्यवस्थापन र सडक) १ करोड २६ लाख, र विशेष अनुदान (बहुक्षेत्रीय पोषण) तर्फ १ करोड ८० लाख, संघीय राजस्व बाँडफाँडबाट ११ करोड ६५ लाख अनुमान छ ।

गण्डकी प्रदेश सरकारबाट प्राप्त हुने समानीकरण अनुदान १ करोड २५ लाख, विशेष अनुदान (बुर्तिबाङ खानेपानी) ४० लाख, समपूरक अनुदान (ढोरपाटन नदी बेलिब्रिज) ६० लाख र सवारी साधन कर (राजस्व बाँडफाँड) तर्फ १ करोड १८ लाख अनुमान छ ।

त्यस्तै स्थानीय स्रोतमध्ये नगरपालिकाको आन्तरिक राजस्व अनुमान २ करोड ९९ लाख ४५ हजार, मालपोत राजस्व बाँडफाँड ८५ लाख र चालु वर्षको बैंक मौज्दातबाट १ करोड ८० लाख उपयोग गरिने नगरपालिकाले उल्लेख गरेको छ ।

ढोरपाटनले सामाजिक विकासतर्फ संघीय सशर्त अनुदानसहित कुल ३१ करोड ४० लाख ७० विनियोजन गरेको छ । शिक्षा, युवा तथा खेलकुद, बालविकास शिक्षक, विद्यालय कर्मचारी, सामुदायिक सिकाई केन्द्रका परिचालक र नगर अनुदान शिक्षकहरूको पारिश्रमिकका लागि ४ करोड ९ लाख विनियोजन गरेको छ ।

स्थानीय पाठ्यपुस्तक “हाम्रो ढोरपाटन’’ छपाईका लागि ६ लाख, आईसिटी तालिम र शैक्षिक विकासका लागि थप ५० लाख, स्वास्थ्य तथा आयुर्वेद सेवातर्फ सङ्घीय सशर्त बाहेक स्वास्थ्य र आयुर्वेदतर्फ ५८ लाख रुपियाँ विनियोजन गरिएको छ ।