इरानविरुद्ध सैन्य कारबाहीमा ट्रम्पलाई धक्का : अमेरिकी सिनेटबाट युद्ध प्रस्ताव पारित

अमेरिकी सिनेटले राष्ट्रपति डोनाल्ड ट्रम्पलाई इरानविरुद्ध सैन्य कारबाही रोक्न वा अगाडि बढाउनुअघि कंग्रेसको स्वीकृति लिनुपर्ने प्रस्ताव पारित गरेको छ। ट्रम्पकै रिपब्लिकन पार्टीको बहुमत रहेको सिनेटमा यो प्रस्ताव पारित हुनुलाई उनको लागि ठूलो धक्का मानिएको छ।

मंगलबार भएको मतदानमा ५०-४८ को मतसहित यो प्रस्ताव पारित भयो, जसमा केही रिपब्लिकन सांसदले डेमोक्र्याटहरूलाई साथ दिएका थिए। इरानसँगको युद्धलाई लिएर दुवै दलमा बढ्दो आक्रोशका कारण यस्तो नतिजा आएको हो। यसअघि जुन महिनामा प्रतिनिधि सभाले पनि यो प्रस्ताव पारित गरिसकेको छ।

यो प्रस्ताव प्रतीकात्मक मात्र भएकाले यसको कानुनी रूपमा कुनै बाध्यकारी प्रभाव छैन। तर, १९७३ को युद्ध शक्ति प्रस्तावपछि कांग्रेसका दुवै सदनले राष्ट्रपतिलाई सैन्य कारबाही रोक्न निर्देशन दिएको यो पहिलो पटक हो। यसले ह्वाइट हाउसमाथि दबाब बढाएको छ।

ह्वाइट हाउसका एक अधिकारीले बीबीसीलाई बताएअनुसार 'अप्रिल ७ मा युद्धविराम भएपछि अब अमेरिकी सेना फिर्ता गर्नुपर्ने कुनै पनि सक्रिय सैन्य कारबाहीहरू छैनन्।' उक्त अधिकारीका अनुसार, दुई रिपब्लिकन सिनेटर अनुपस्थित भएकाले मात्र यो प्रस्ताव पारित भएको हो।

प्रस्तावको पक्षमा रान्ड पल, लिसा मुर्कोव्स्की, सुसान कोलिन्स र बिल कासिडीले डेमोक्र्याटलाई साथ दिएका थिए भने विपक्षमा डेमोक्र्याटिक सिनेटर जोन फेटरम्यान मात्र उभिएका थिए। नोभेम्बरमा हुने मध्यावधि चुनावअघि रिपब्लिकन पार्टीभित्र बढ्दो मतभेदको रूपमा यो मतदानलाई हेरिएको छ। बीबीसी

Follow @nagarik_news