सुरक्षा निकायमा कार्यक्षेत्रगत अन्योलता, सशस्त्रको भूमिका

आगामी ३० देखि ५० वर्षको राष्ट्रिय सुरक्षा आवश्यकतालाई मध्यनजर गरी सशस्त्र प्रहरीलाई केवल नाम मात्रको संगठनमा सीमित नराखी आन्तरिक र सीमा सुरक्षाको भरपर्दो र व्यावसायिक संगठनका रूपमा विकास गर्नुपर्छ।

मुलुकको सुरक्षा संरचनाको इतिहास हेर्दा, पृथ्वीनारायण शाहद्वारा सुरु गरिएको राज्य एकीकरणको कालदेखि नै राष्ट्रिय सुरक्षा मुख्यत: सेना केन्द्रित थियो। कालान्तरमा, आन्तरिक शान्ति सुव्यवस्थाको जिम्मेवारी नेपाल प्रहरीको काँधमा आयो। २०५२ सालमा सुरु भएको आन्तरिक विद्रोह (माओवादी सशस्त्र द्वन्द्व) को समयमा सुरुवाती चरणमा नेपाल प्रहरीलाई नै परिचालन गरियो।