पिएसजीको जितपछि पेरिसमा 'ताण्डव': आगजनी र तोडफोडले सहर त्रसित!

फ्रान्सेली टोली पेरिस सेन्ट जर्मेन (पिएसजी) ले इंग्लिस क्लब आर्सनलविरूद्ध युरोपियन च्याम्पियन्स लिगको उपाधि भिडन्तमा पेनाल्टी सुटआउटमा रोमाञ्चक जित हात पारेलगत्तै पेरिसको प्रसिद्ध चाम्स–एलिसेस क्षेत्रमा समर्थकहरूको ठूलो भीड ओइरियो। तर, यो खुसीयाली छिट्टै हिंसामा परिणत भयो।

सहरबाट प्राप्त दृश्यहरूमा प्रदर्शनकारीहरूले आगोका लप्का बालेको, सडकमा इलेक्ट्रिक बाइकहरू जलाएको र कम्तीमा एउटा पसलको सिसा फुटाएको देखिन्छ। खेलको सुरुवातमै पेरिस सेन्ट जर्मेनको रंगशाला 'पार्क दे प्रिन्स' बाहिर ठूला स्क्रिनमा खेल हेर्न जम्मा भएका समर्थक र प्रहरीबीच झडप भएको थियो।