पानामा विश्वकपबाट बाहिरियो, क्रोएसियाको नकआउट सम्भावना जीवितै

काठमाडौँ । क्रोएसियाले पानामालाई १–० ले पराजित गर्दै फिफा विश्वकप २०२६ को नकआउट चरण पुग्ने आशा जीवित राखेको छ ।

मंगलबार टोरन्टो स्टेडियममा भएको समूह ‘एल’ को खेलमा दोस्रो हाफमा मैदान प्रवेश गरेका आन्टे बुडिमिरले निर्णायक गोल गरे ।

३४ वर्षीय बुडिमिरले ५४औँ मिनेटमा गरेको गोल नै खेलको एकमात्र गोल बन्यो । यो उनको विश्वकपमा पहिलो तथा क्रोएसियाका लागि प्रतिस्पर्धात्मक खेलमा पाँचौँ गोल हो ।

जितसँगै क्रोएसिया तीन अंकसहित समूहको तेस्रो स्थानमा रहेको छ । अब शनिबार फिलाडेल्फियामा हुने अन्तिम समूह खेलमा घानालाई हराउन सके क्रोएसियाले अन्तिम ३२ मा स्थान सुरक्षित गर्नेछ ।

पानामा भने लगातार दोस्रो हार बेहोर्दै प्रतियोगिताबाट बाहिरिने निश्चित भएको छ। विश्वकप इतिहासमा पाँच खेल खेलिसकेको पानामाले अझै अंक जोड्न सकेको छैन । टोलीले पहिलो खेलमा पनि घानासँग १–० को हार व्यहोरेको थियो ।

खेलको ५४औँ मिनेटमा जोसिप स्टानिसिच र मार्को पासालिचको उत्कृष्ट संयोजनपछि आएको क्रसमा बुडिमिरले नजिकैबाट सहज गोल गर्दै क्रोएसियालाई अग्रता दिलाएका थिए । पानामाका गोलकिपर ओरलान्डो मोस्केराले बल रोक्ने प्रयास गरे पनि सफल हुन सकेनन् ।

गोलपछि खेल केही समय निकै रोमाञ्चक बनेको थियो । तीन मिनेटपछि कप्तान लुका मोड्रिचको लामो पासमा पासालिच एक्लै गोलतर्फ अघि बढे पनि मोस्केराले उत्कृष्ट बचाउ गरे । रिबाउन्डमा आएको अवसर पनि पासालिचले सदुपयोग गर्न सकेनन् ।

त्यसपछि पानामाले लगातार दबाब सिर्जना गर्दै क्रोएसियाली गोलकिपर डोमिनिक लिभाकोभिचलाई एक मिनेटभित्र तीन पटक बचाउ गर्न बाध्य बनायो । विशेषगरी कार्लोस हार्भेको हेडरमा उनले गरेको बचाउ उत्कृष्ट रह्यो ।

दोस्रो हाफको हाइड्रेसन ब्रेकपछि भने पानामाको लय कमजोर बन्यो र लिभाकोभिचमाथि थप ठूलो खतरा सिर्जना हुन सकेन ।

यसअघि मंगलबार नै भएको अर्को खेलमा इंग्ल्यान्ड र घाना ०–० को बराबरीमा रोकिएका थिए । त्यस नतिजापछि दुवै टोलीको समान चार अंक पुगेको छ भने क्रोएसियाको तीन अंक छ।

अब समूह ‘एल’ को अन्तिम चरणमा इंग्ल्यान्डले पानामासँग र क्रोएसियाले घानासँग खेल्नेछन् । समूहका शीर्ष दुई टोली नकआउट चरणमा प्रवेश गर्नेछन् ।