स्वास्थ्य परीक्षणको नतिजा जिल्लामा

गुल्मी अस्पताल तम्घासले प्रयोगशाला सेवालाई थप प्रभावकारी र पहुँचयोग्य बनाउने तयारी गरेको छ । यसका लागि अस्पतालले प्रादेशिक जनस्वास्थ्य प्रयोगशाला, लुम्बिनी प्रदेशसँग सहकार्य गरी अस्पतालमा उपलब्ध नभएका प्रयोगशाला परीक्षणको नमुना प्रदेश प्रयोगशालामा पठाई नतिजा पुनः अस्पतालमै उपलब्ध गराउने व्यवस्था मिलाएको छ ।

दुई संस्थाबिच भएको सम्झौता आगामी आर्थिक वर्षदेखि कार्यान्वयनमा आउने भएको छ । सम्झौतामा क्यान्सर, विभिन्न भाइरल सङ्क्रमण, हर्मोनलगायतका जटिल परीक्षणका लागि बिरामीले बुटवल वा निजी अस्पताल धाउनुपर्ने बाध्यता कम हुने अपेक्षा गरिएको छ ।

गुल्मी अस्पतालका निमित्त मेडिकल सुपरिन्टेन्डेन्ट डा. विभव बस्यालका अनुसार सेवा सञ्चालनका लागि आवश्यक जनशक्ति व्यवस्थापन, नमुना सङ्कलन र ढुवानी प्रक्रियासम्बन्धी तयारी भइरहेको छ । उहाँले यस व्यवस्थाले रोग पहिचान र उपचार प्रक्रियालाई थप सहज तथा प्रभावकारी बनाउने विश्वास व्यक्त गर्नुभयो ।

हाल गुल्मी अस्पतालमा प्रविधि, उपकरण तथा जनशक्तिको अभावका कारण धेरै प्रकारका विशेष परीक्षण सम्भव छैनन् । मेडिकल ल्याब प्राविधिक केपी भण्डारीका अनुसार कम सङ्ख्यामा हुने र महँगा परीक्षणहरू प्रादेशिक जनस्वास्थ्य प्रयोगशालामार्फत गराउने सहमति भएको हो । सेवा सञ्चालनमा आएपछि बिरामीले अस्पतालमै रगतको नमुना दिएर न्यून शुल्कमा परीक्षण गराउन सक्ने छन् भने नतिजासमेत अस्पतालबाटै प्राप्त गर्न सक्ने छन् । यसले विशेष गरी आर्थिक रूपमा कमजोर नागरिकलाई राहत पुग्ने अपेक्षा गरिएको छ ।

सेवा विस्तारसँगै गुल्मी अस्पतालले उपचार सेवाको गुणस्तरमा समेत उल्लेखनीय सुधार गरिरहेको छ । अस्पतालले हालै स्तन क्यान्सरबाट पीडित रेसुङ्गा नगरपालिका–८ की ७२ वर्षीय महिलाको सफल शल्यक्रिया सम्पन्न गरेको छ ।

अस्पतालले डेढ वर्षदेखि प्रत्येक महिनाको दोस्रो शनिबार क्यान्सर रोग परीक्षण सेवा सञ्चालन गर्दै आएको छ । सोही क्रममा ती महिलामा स्तन क्यान्सरको आशङ्का देखिएपछि थप परीक्षणका लागि बुटवल पठाइएको थियो ।

परीक्षणबाट क्यान्सर पुष्टि भएपछि लुम्बिनी प्रादेशिक अस्पतालका स्तन तथा क्यान्सर रोग विशेषज्ञ शल्य चिकित्सक डा. सञ्जय पाण्डेको नेतृत्वमा गुल्मी अस्पतालमै शल्यक्रिया गरिएको थियो । डा. पाण्डेका अनुसार शल्यक्रिया सफल भएको छ र बिरामीको स्वास्थ्य अवस्था हाल सामान्य रहेको छ ।

गुल्मी अस्पतालबाट दैनिक औसत २५० जना सेवाग्राहीले सेवा लिँदै आएका छन् । अस्पतालमा बालरोग, हाडजोर्नी, प्रसूति तथा स्त्रीरोगलगायतका विशेषज्ञ सेवा उपलब्ध छन् भने मिर्गौला रोगीका लागि डायलासिस सेवासमेत सञ्चालनमा छ ।

रेसुङ्गा नगरपालिकाका प्रमुख खिलध्वज पन्थीले पटक पटक ताकेता गर्दा पनि निर्माण कम्पनीले काम सम्पन्न नगरेको बताउनुभयो । भारत सरकारको पूर्ण आर्थिक सहयोगमा सडक, सहरी तथा भवन निर्माण आयोजना पाल्पामार्फत निर्माण भइरहेको अस्पताल भवनको ठेक्का २०७८ असार १८ गते स्वच्छन्द–बानियाँ जेभी, मकवानपुरले पाएको थियो । स्वास्थ्य सेवा विस्तारमा उल्लेखनीय प्रगति गरिरहेको गुल्मी अस्पतालका लागि अत्याधुनिक भवन समयमै निर्माण हुन सके सेवा प्रवाह थप प्रभावकारी हुने स्थानीयको अपेक्षा छ ।