तनहुँमा बाढी पसेपछि १३ परिवार विस्थापित

तनहुँको शुक्लागण्डकी नगरपालिका–२, एक्लेखेतमा बाढीको पानी घरमा पसेपछि १३ घरपरिवार विस्थापित भएका छन्। उनीहरूलाई सुरक्षित स्थानमा स्थानान्तरण गर्ने काम भइरहेको छ।

अविरल वर्षाका कारण बुधबार बिहान करिब २ बजे ताकुडाँडाको खोल्सीमा पानीको बहाव बढेपछि बाढी बस्तीमा पसेको हो। बाढीको पानी घरभित्र पसेपछि स्थानीयवासीलाई सुरक्षित स्थानमा सार्ने काम भइरहेको जिल्ला प्रहरी कार्यालय तनहुँले जनाएको छ।