परोपकार घाटमा अश्लील हर्कत गर्ने ४ जना पक्राउ

विराटनगर– मोरङको विराटनगर महानगरपालिका–१ स्थित परोपकार घाटमा अश्लील हर्कत गरेको आरोपमा प्रहरीले ४ जनालाई पक्राउ गरेको छ।

जिल्ला प्रहरी कार्यालय मोरङको प्रेस विज्ञप्ति अनुसार दाहसंस्कार गरिने सार्वजनिक स्थानमा अश्लील हर्कत तथा हो–हल्ला गर्ने कार्यमा संलग्न उनीहरूलाई प्रहरीले नियन्त्रणमा लिएको हो।

असार ९ गते राती परोपकार घाटमा केही मानिसहरू भेला भई हो–हल्ला गरिरहेको र सो मध्येका २ जना पुरुषहरू पूर्ण रूपमा निर्वस्त्र रहेको भन्ने विशेष जानकारी प्रहरीलाई प्राप्त भएको थियो।

जानकारी प्राप्त हुनासाथ जिल्ला प्रहरी कार्यालय, मोरङबाट खटिएको प्रहरी टोलीले उनीहरूलाई तत्काल नियन्त्रणमा लिएको थियो।

प्रहरीले पक्राउ गरेकामा बिराटनगर–६ का सुरेन्द्र मणि मण्डल, सुनसरी रामधुनी–६ का कैलाश ढुङ्गाना, रामप्रसाद गाउँपालिका–६ का मनिस काफ्ले र बिराटनगर–४ का छबिलाल घिमिरे रहेको प्रहरीले जनाएको छ।

पक्राउ परेका चारै जनालाई जिल्ला प्रहरी कार्यालय, मोरङमा राखेर थप अनुसन्धान कार्य अगाडि बढाइएको सूचना अधिकारी प्रहरी नायब उपरीक्षक मकेन्द्र कुमार मिश्रले जानकारी दिए।