श्रीलंका टापुका १० हजार जोखिममा

सुनसरीको बराह क्षेत्र नगरपालिका–६ का अर्जुन चन्द्रवंशी ६२ वर्ष पुगे। जन्मेदेखि नै उनी श्रीलंका टापुमा बस्दै आएका छन्। तर यस वर्ष सप्तकोसी नदी कटान गर्दै उनको घरनजिकै पुगेपछि बगाउला भन्ने चिन्ताले उनलाई सताउन थालेको छ। पुस्तौंदेखि खेती गर्दै आएको उर्वर भूमि छाडेर कहाँ जाने भन्ने प्रश्न पनि उनीसामु तेर्सिएको छ। ‘यस वर्ष कोसीको कटान हेर्दै बस्यौं,’ चन्द्रवंशीले भने, ‘सधैंभरि यसरी बस्न सकिन्छ जस्तो लाग्न छाडिसक्यो।’

बराहक्षेत्र–६ र ९ मा पर्ने श्रीलंका टापुतर्फ असारदेखि सुरु भएको कोसीको कटान अझै रोकिएको छैन। ‘आँखाले हेर्दा निकै पर बग्ने खोला अब आँगनछेउ आइपुगेको छ,’ चन्द्रवंशीले भने, ‘अब आउने वर्षदेखि जसरी पनि श्रीलंका टापुबाहेक अन्यत्रै बसोबासको व्यवस्था मिलाउने योजना बनाएको छु।’