सीटीईभीटीमा नयाँलाई मौका देऊ

प्राविधिक शिक्षा तथा व्यावसायिक तालिम परिषद्को एक उपाध्यक्ष पदका लागि परिषद्का आठ पूर्वकर्मचारीसहित २५ जनाको नाम सार्वजनिक भएको छ । तीमध्ये आठजना सोही कार्यालयका पूर्वउपाध्यक्ष र निर्देशक छन् । भर्खरै जागिर छाडेका उनीहरुले उपाध्यक्ष हुन प्रयास जारी राखेका छन् । तीन दशक जागिरे जीवन बिताएका पूर्वकर्मचारी फेरि उपाध्यक्षको पद हत्याउने दाउमा देखिन्छन् । जेनजीको बलबाट बनेको अहिलेको सरकार दोहोरो अवसरको विपक्षमा देखिएको छ । पुरानो मान्यताबाट पछि हटेर नयाँ जोश र जाँगर भएका व्यक्तिलाई उपाध्यक्ष बनाउने विषयमा चौतर्फी दबाबसमेत बढेको छ ।

लामो समय परिषद्मा जागिरे जीवन बिताएर भर्खरै अवकाश भएका कर्मचारीले उपाध्यक्षमा निवेदन दिनु उचित होइन । अवकाशपछि केही समय आराम गरेर पछि आफू अनुकूलको पेसा अँगाल्नुचाहिँ उचित हुनेछ । अवकाश भएको वर्षदिन बित्न नपाउँदै फेरि कार्यकारी पदमा आउन खोज्नु गलत नियत पनि हुन सक्छ । परिषद्का पूर्वकर्मचारी एवं भर्खरै उपाध्यक्षबाट राजीनामा दिएका मोहम्मत सफिउल्लाह, पूर्वनिर्देशक उमेशकुमार मिश्र, टैलेन्द्र आचार्य, नागेन्द्र शाह, कुष्माकर भट्ट, सौरभराम जोशी, हेमन्त पराजुली र उपेन्द्र पोखरेल छन् । अधिकांश उम्मेदवारले आफू उपाध्यक्ष भएरै छाड्ने दाबी गरेका छन् । पटक–पटक अवसर लिएका भन्दा पनि नयाँ अवसरको खोजीमा रहेका विज्ञलाई उपाध्यक्ष बनाउनु उचित हुनेछ । सरकारको पनि त्यही तयारी रहेको देखिन्छ ।