प्रभावित क्षेत्रमा विद्यालय खोल्ने वातावरण बनाऊ

रसुवा भोटेकोशी बाढी प्रभावित तीन जिल्लाको शैक्षिक क्षतिको तथ्याङ्क सार्वजनिक भएको छ । तथ्याङ्कको आधारमा उल्लेख भएका विषय सम्बोधन गरी तत्काल विद्यार्थीको कक्षा सञ्चालन गर्नुपर्ने प्रतिवेदनमा औँल्याइएको छ । शिक्षा विभागले द्रुत क्षति तथा आवश्यकता विश्लेषण प्रतिवेदनमा रसुवा, धादिङ र नुवाकोटका शिक्षण संस्थाको सबै विवरण तयार गरिसकेको छ । करिब १० हजार विद्यार्थी पढाइबाट वञ्चित भएका छन् । अब उनीहरुको पढ्न पाउने अधिकार सुनिश्चित गर्नुपर्छ । प्रतिवेदनमा क्षति विवरण र सिफारिस गरेका विषयलाई तत्काल सम्बोधन गरी विद्यालयमा विद्यार्थी आउने वातावरण बनाउनुपर्छ ।

तथ्याङ्क अनुसार ३४ शैक्षिक संस्थामध्ये ३१ वटामा भौतिक क्षति भएको छ । कुल ४५ वटा विद्यालय भवन र २६८ वटा कक्षाकोठा क्षतिग्रस्त भएका छन् । सार्वजनिक शैक्षिक पूर्वाधारमा भवन क्षतिको ७१ प्रतिशतभन्दा बढी र कक्षाकोठा क्षतिको ६२ प्रतिशतभन्दा बढी हिस्सा रहेको छ । जिल्लागत रूपमा नुवाकोट, विशेष गरी विदुर नगरपालिका सबैभन्दा बढी भौतिक क्षति भएको क्षेत्रका रूपमा देखिएको छ । भौतिक क्षतिका कारण १९ विद्यालय पूर्ण रूपमा बन्द छन् भने चार विद्यालय अस्थायी बन्द छन् । सातवटा मात्र सामान्य रूपमा सञ्चालनमा रहेका छन् । यसले प्रभावित बालबालिकाको नियमित सिकाइमा तत्काल र दीर्घकालीन अवरोध सिर्जना गरेको छ ।