फोहोरमैला व्यवस्थापनसम्बन्धी विधेयक संसदमा दर्ता गर्ने तयारी

काठमाडौँ । सरकारले फोहोरमैला व्यवस्थापनलाई थप व्यवस्थित र प्रभावकारी बनाउन नयाँ विधेयक संघीय संसद्मा दर्ता गर्ने तयारी गरेको छ । कानुन, न्याय तथा संसदीय मामिलामन्त्री सोबिता गौतमका अनुसार फोहोर उत्पादनदेखि सुरक्षित रूपमा अन्तिम व्यवस्थापन गर्ने चरणसम्मका सबै पक्षलाई समेटेर विधेयक तयार गरिएको हो ।

प्रस्तावित कानुनी व्यवस्थामा फोहोर उत्पादन कम गर्ने उपायदेखि स्रोतमै वर्गीकरण, सङ्कलन र स्थानान्तरण केन्द्रसम्मको ढुवानीलाई समेटिएको छ । त्यसपछि प्रशोधन केन्द्रमा फोहोरको पुनःप्रयोग तथा पुनःप्रशोधन गर्ने र त्यसबाट मल, ग्यास वा ऊर्जा उत्पादन गर्नेसम्मका विषयलाई विधेयकमा समावेश गरिएको मन्त्री गौतमले जानकारी दिएकी छन् ।