कोशीकी सांसद निर्मला लिम्बुलाई हटाउने तयारीमा जसपा नेपाल

जनता समाजवादी पार्टी (जसपा) नेपालले कोशी प्रदेशसभाकी सांसद निर्मला लिम्बुलाई पदमुक्त गर्ने तयारी थालेको छ ।

सर्वोच्च अदालतले पार्टी विभाजनको विवादमा उपेन्द्र यादव नेतृत्वको जसपा नेपालको पक्षमा फैसला सुनाएपछि पार्टीले लिम्बुलाई हटाउने प्रक्रिया अगाडि बढाएको हो ।

अशोक राई नेतृत्वको समूहले पार्टी फुटाएर नयाँ दल गठन गर्दा लिम्बुले राईको पक्षमा सनाखत गरेकी थिइन्, जसका कारण अहिले उनीमाथि कारबाहीको तरबार झुण्डिएको हो ।

गत बिहीबार सर्वोच्च अदालतका न्यायाधीशहरू कुमार रेग्मी, महेश शर्मा पौडेल र श्रीकान्त पौडेलको पूर्ण इजलासले उपेन्द्र यादव नेतृत्वको जसपा नेपाललाई नै आधिकारिकता दिने गरी रिट जारी गर्ने निर्णय सुनाएको थियो ।

निर्वाचन आयोगले अशोक राईको समूहलाई नयाँ दलको रूपमा मान्यता दिएको निर्णयलाई चुनौती दिँदै यादवले सर्वोच्चमा रिट दायर गरेका थिए । अदालतको यो फैसलासँगै अब उपेन्द्र यादव नेतृत्वको पार्टीले आफ्ना पुराना संरचना र निर्णयहरूलाई पुन: सक्रिय बनाउनुका साथै अर्को पक्षमा लागेका जनप्रतिनिधिहरूमाथि कानूनी डण्डा चलाउन सक्ने बाटो खुलेको छ ।

जसपा नेपालका केन्द्रीय सदस्य जयराम यादवले सांसद निर्मला लिम्बुले अब नैतिकताका आधारमा राजीनामा दिनुपर्ने बताए ।

‘पार्टीले उहाँलाई विश्वास गरेर पठाएको थियो, तर पार्टी संकटमा परेका बेला उहाँले अर्को समूह रोज्नुभयो’, उनले भने, ‘अब अदालतले नै उपेन्द्र यादव नेतृत्वको पार्टीलाई आधिकारिकता दिइसकेको अवस्थामा उहाँले सांसद पद ओगटिरहनु नैतिक रूपमा सुहाउँदैन । उहाँले नैतिकता प्रदर्शन गर्दै आफैं राजीनामा दिनु उपयुक्त हुन्छ । अन्यथा पार्टीले आफ्नो कानूनी अधिकार प्रयोग गर्नेछ ।’

पार्टीका संघीय अध्यक्ष उपेन्द्र यादवले भने यो विषय प्रदेशको क्षेत्राधिकारभित्र पर्ने भन्दै निर्णय गर्ने जिम्मा प्रदेश समितिलाई नै दिएको बताए । यादवका अनुसार प्रदेशमा के गर्ने भन्ने विषयमा प्रदेश समितिले नै थप छलफल र निर्णय लिनेछ ।

लिम्बु अशोक राईकै पार्टीमा रहने वा पुरानै घरमा फर्किने भन्ने विषयमा ठोस टुंगो नलागिसकेको भए पनि उनले यसअघि नै राईको पक्षमा सनाखत गरिसकेकाले पार्टीले उनलाई सहजै स्वीकार गर्ने अवस्था भने नरहेको नेताहरू बताउँछन् ।

जसपा नेपाल कोशी प्रदेशका अध्यक्ष दीपक याख्खाले भने सांसद लिम्बुलाई अनुशासनको कारबाही गरी हटाउने निश्चित रहेको बताएका छन् ।

उनले पार्टीले आफ्नो कानूनी अधिकार प्रयोग गरेरै उनलाई पदमुक्त गर्ने स्पष्ट पारे । ‘हामी अहिले सर्वोच्च अदालतको फैसलाको पूर्णपाठ कुरेर बसिरहेका छौं,’ अध्यक्ष याख्खाले भने, ‘फैसलाको पूर्णपाठ आउनेबित्तिकै हामी निर्वाचन आयोगमा पत्र पठाउँछौं । उहाँलाई हटाएपछि आयोगमा बुझाइएको समानुपातिक बन्द सूचीको दोस्रो नम्बरमा रहेका उम्मेदवारलाई सांसदका लागि सिफारिस गर्ने हाम्रो योजना छ ।’

लिम्बु कोशी प्रदेशसभामा जसपा नेपालको तर्फबाट एक मात्र सांसद हुन् । पार्टी विभाजनपछि निर्वाचन आयोगले दिएको समय सीमाभित्र उनले २०८१ जेठ १ गते विराटनगरस्थित प्रदेश निर्वाचन कार्यालयमा पुगेर अशोक राई नेतृत्वको जनता समाजवादी पार्टीको पक्षमा सनाखत गरेकी थिइन् । उनी अशोक राईको पक्षमा उभिएपछि कोशी प्रदेशसभामा उपेन्द्र यादव नेतृत्वको जसपा नेपालको प्रतिनिधित्व शून्य हुन पुगेको थियो ।

अशोक राई नेतृत्वको समूहले नयाँ पार्टी दर्ताका लागि निर्वाचन आयोगमा निवेदन दिइसकेको छ ।

लिम्बुले भने आफू आधिकारिक पार्टीमै रहने धारणा राखेकी छन् । उनले नेताहरूको आपसी लडाइँमा आफू पर्न नचाहेको बताएकी छन् ।

उनले नैतिकताका आधारमा हिजो एउटा पक्षलाई समर्थन गरे पनि अबको कानूनी फैसला र राजनीतिक वास्तविकतालाई स्वीकार गरेर अघि बढ्ने संकेत गरेकी छन् ।