तीन दिनको मौसम : तराईमा तातो हावा र पहाडमा चट्याङसहितको वर्षाको सम्भावना

काठमाडौं : जल तथा मौसम विज्ञान विभाग,मौसम पूर्वानुमान महाशाखाले तराई भेगमा तातो हावा चल्ने पूर्वानुमान गरेको छ । आगामी तीन दिनसम्म सुदूरपश्चिम र लुम्बिनी प्रदेशका तराई क्षेत्रमा तातो हावा चल्न सक्ने भएकाले महाशाखाले सर्वसाधारणलाई तातोबाट जोगिन र सावधानी अपनाउन आग्रह समेत गरेको छ ।

जल तथा मौसम विज्ञान विभागका प्रवक्ता विभूति पोखरेलले देशका हिमाली तथा पहाडी भेगमा चट्याङसहित वर्षा हुने सम्भावना रहेको जानकारी दिए । त्यस्तै सुदूरपश्चिम र लुम्बिनी प्रदेशका तराई क्षेत्रमा तातो लहरको सम्भावनाका साथै बागमती र गण्डकी प्रदेशमा पनि तापक्रम बढ्ने सम्भावना रहेको उनले बताए।

नेपालमा यस वर्षको मनसुन असार ५ गते कोशी प्रदेशबाट भित्रिए पनि हाल मनसुन कमजोर अवस्थामा रहेकाले देशका अन्य भू-भाग विस्तार हुन अझै केहि दिन लाग्ने महाशाखाले जनाएको छ ।