खरायो पालक किसानको बस्तीमा कर्णालीका कृषिमन्त्री

सुर्खेत । कर्णालीका भूमि, व्यवस्था, कृषि तथा सहकारी विकास मन्त्री भीम प्रकाश शर्मा खरायो पालक किसानहरूको बस्तीमा पुगेका छन् । जुम्लाको चन्दनाथ नगरपालिका–८ र ९ खरायो पालनका लागि ‘हब’का रूपमा चर्चित छन् ।

मन्त्री शर्मा शनिबार ती गाउँमा पुगेका थिए । त्यहाँ अंगुरा जातको खरायो पाल्ने गरिएको छ । वडा नम्बर ८ का खरायो पालक किसान पदम बहादुर रोकायाले खरायो पाल्न थालेको १७ वर्ष भयो । ‘रोकाया खरायो पालन उद्योग’ छ, उनको । अहिले उनीसँग ९० वटा खरायो छन् ।