दंगीशरणको नीति, कार्यक्रम अनुमोदन

काठमाडौं - दाङको दंगीशरण गाउँपालिकाले आर्थिक वर्ष २०८३÷८४ को लागि नीति तथा कार्यक्रम सार्वजनिक गरेको छ ।

मंगलबार बसेको २१ औं गाउँसभामा गाउँपालिका अध्यक्ष शम्भु गिरीले आर्थिक वर्ष २०८३/८४ को वार्षिक नीति तथा कार्यक्रम पेश गरेका थिए । प्रस्तुत नीति तथा कार्यक्रममा विद्यालयमा डिजिटल पूर्वाधार विकास, शिक्षण–सिकाइ प्रक्रियामा सुधारका लागि बजेट विनियोजन तथा वैदेशिक रोजगारीबाट फर्किएका युवाहरूलाई उद्यमशीलतामा आबद्ध गराउन विशेष उद्यम कार्यक्रम सञ्चालन गर्ने नीति लिएको उल्लेख छ । त्यस्तै, कृषि क्षेत्रमा बढ्दो समस्याका रूपमा रहेको रासायनिक मल तथा विषादीको अत्यधिक प्रयोगलाई न्यूनीकरण गर्न जैविक मल र जैविक विषादी उत्पादन तथा प्रयोगलाई प्रोत्साहन गर्ने कार्यक्रम पनि नीति तथा कार्यक्रममा समेटिएको छ । अध्यक्ष गिरीले पेश गरेको नीति तथा कार्यक्रम सामान्य छलफलपछि मंगलबार नै गाउँसभाले पारित गरेको छ ।