सङ्घीय संसद्‌मा डिजिटल पार्लियामेन्ट प्लेटफर्मको परीक्षण सुरु

काठमाडौँ । सङ्घीय संसद् सचिवालयले संसदीय सूचना, सेवा र अभिलेखलाई थप व्यवस्थित, पारदर्शी तथा प्रविधिमैत्री बनाउने उद्देश्यले डिजिटल पार्लियामेन्ट प्लेटफर्मको परीक्षण सञ्चालन सुरु गरेको छ।

सचिवालयले सञ्चालनमा ल्याएको यस प्लेटफर्मको प्रतिनिधि सभाका सभामुख डोलप्रसाद अर्याल र राष्ट्रिय सभाका अध्यक्ष नारायणप्रसाद दाहालले संयुक्त रूपमा शुभारम्भ गरे । सङ्घीय संसद् सचिवालयका प्रवक्ता एकराम गिरीका अनुसार प्रणाली कार्यान्वयनमा आएसँगै दुवै सदन र समितिका बैठकमा बायोमेट्रिक र एनएफसी प्रविधिमार्फत सांसदहरूको उपस्थिति, अनुपस्थिति र बिदाको विवरण स्वचालित रूपमा अभिलेख हुनेछ। यसले बैठकमा सांसदहरूको सहभागितालाई वास्तविक समयमा ट्र्याक गर्न सघाउनेछ।