सोलेका बाढीपीडितको गुनासो : ‘अब पुरानै ठाउँमा फर्केर बस्न सक्दैनौँ’

काठमाडौँ । भोटेकोशी बाढीबाट थातथलो र परिवार गुमाएका नुवाकोटको विदुर नगरपालिका–७ सोलेका पीडित स्थानीयले आफूहरू अब सोही गाउँमा बस्न नसक्ने गुनासो गरेका छन् । उनीहरूले विस्थापितका लागि छुट्टै ठाउँको व्यवस्थापन गर्न वा प्याकेजमा एकमुष्ट रकम उपलब्ध गराए आफूहरू आफैँ घर निर्माण गर्ने बताएका छन् ।

हाल विदुर नगरपालिकाले विदुर नगरपालिका–७ सोलेका स्थानीयलाई तुप्चेकै भित्रिनटारमा स्थानान्तरण गर्ने तयारी गरे पनि पीडितहरूले उक्त ठाउँ आफूहरूका लागि उपयुक्त नभएको बताएका छन् । बुधबार नुवाकोटका सांसद अच्युतम लामिछानेलाई बाढीबाट विस्थापित पीडितहरूले ध्यानाकर्षणसमेत गराएका छन् ।