शिवपुरीमा निःशुल्क स्वास्थ्य शिविर, ३५० भन्दा बढी स्थानीय लाभान्वित

काठमाडौँ / रोटरी क्लब अफ बानेश्वरले काठमाडौँ मेडिकल कलेजको सहकार्यमा नुवाकोटको शिवपुरी गाउँपालिकास्थित शिवालय प्राथमिक विद्यालयमा सामुदायिक स्वास्थ्य शिविर सञ्चालन गरेको छ। गत जनवरी २५ मा आयोजित शिविरबाट ३५० भन्दा बढी स्थानीय बासिन्दा लाभान्वित भएका छन्।

शिविरमा सामान्य चिकित्सा, सामान्य शल्यचिकित्सा, बालरोग, हाडजोर्नी, प्रसूति तथा स्त्रीरोग, दाँत, आँखा तथा नाक–कान–घाँटी (ईएनटी) सम्बन्धी परामर्श तथा उपचार सेवा प्रदान गरिएको थियो। साथै ईसीजी, अल्ट्रासाउण्ड (यूएसजी) तथा विभिन्न प्रयोगशाला परीक्षण सेवासमेत उपलब्ध गराइएको थियो।

ग्रामीण क्षेत्रमा स्वास्थ्य सेवामा पहुँच सीमित रहेका कारण शिविरले स्थानीय बासिन्दालाई स्वास्थ्य परीक्षण, रोग पहिचान तथा विशेषज्ञ चिकित्सकसँग परामर्श गर्ने अवसर प्रदान गरेको आयोजकले जनाएको छ।

कार्यक्रममा विभिन्न औषधि कम्पनीहरूको सहयोगमा बिरामीहरूलाई करिब १ लाख १४ हजार रुपैयाँ बराबरको औषधि निःशुल्क वितरण गरिएको थियो। यसले आर्थिक अभावका कारण उपचारबाट वञ्चित हुने अवस्थालाई कम गर्न सहयोग पुगेको बताइएको छ।

स्थानीय समुदायले शिविरप्रति उत्साहजनक प्रतिक्रिया जनाएको छ। धेरै सहभागीका लागि विशेषज्ञ चिकित्सकसँगको यो पहिलो परामर्श थियो भने कतिपयले महिनौँदेखि स्वास्थ्य परीक्षण गराउन नपाएको अवस्थामा शिविरमार्फत सेवा प्राप्त गरेका थिए।

रोटरी क्लब अफ बानेश्वरले कार्यक्रम सफल बनाउन सहयोग पुर्‍याउने काठमाडौँ मेडिकल कलेज, शिवपुरी गाउँपालिका, शिवालय प्राथमिक विद्यालय, औषधि कम्पनीहरू, रोटेरियन तथा स्वयंसेवकहरूलाई धन्यवाद ज्ञापन गरेको छ।

रोटरी इन्टरनेसनलअन्तर्गतको सदस्य संस्था रोटरी क्लब अफ बानेश्वरले स्वास्थ्य, शिक्षा, वातावरण तथा सामुदायिक विकासका क्षेत्रमा विभिन्न सामाजिक कार्यक्रम सञ्चालन गर्दै आएको छ।

क्लबले ‘सर्भिस अबोभ सेल्फ’ तथा ‘युनाइट फर गुड’ अभियानअनुरूप समुदायको जीवनस्तर सुधारका पहलहरू अघि बढाइरहेको जनाएको छ।

सम्बन्धित विषय:

# शिवपुरी

# स्वास्थ्य शिविर