हेटौंडामा निर्माण व्यवसायी घिमिरेमाथि आक्रमण

हेटौंडा । मकवानपुरको हेटौंडामा निर्माण व्यवसायी समाज घिमिरेमाथि आक्रमण भएको छ ।

जिल्ला प्रहरी कार्यालय मकवानपुरका अनुसार हेटौंडा उपमहानगरपालिका–५ स्थित टी टाइम क्याफे नजिक गएराति करिब ११ बजे हेटौंडा–२ निवासी घिमिरेमाथि आक्रमण भएको हो ।

प्रहरी नायब उपरीक्षक तथा जिल्ला प्रहरी कार्यालय मकवानपुरका प्रवक्ता माधव काफ्लेका अनुसार आक्रमणबाट घिमिरेको अनुहारसहित शरीरका विभिन्न भागमा चोट लागेको छ । प्रारम्भिक अनुसन्धानबाट राजु घिमिरे नामका व्यक्तिले आपसी विवादका क्रममा कुटपिट गर्दै धारिलो हतियार प्रहार गरेको खुलेको प्रहरीले जनाएको छ ।

घटनापछि आरोपित राजु घिमिरे काठमाडौंतर्फ फरार भएका छन् । उनको खोजी कार्य जारी रहेको प्रहरीले जनाएको छ ।

प्रहरीका अनुसार घटनाअघि दुवै जना सँगै बसेर मदिरा सेवन गरेका थिए । सोही क्रममा विवाद बढ्दै जाँदा आक्रमण भएको हुन सक्ने प्रारम्भिक निष्कर्ष छ । घटनाको कारण र अन्य पक्षबारे थप अनुसन्धान भइरहेको प्रहरीले जनाएको छ ।

घटनापछि घाइतेका परिवारले जाहेरी दिने तयारी गरिरहेको र जाहेरी प्राप्त भएपछि कानुनी प्रक्रिया अगाडि बढाइने प्रवक्ता काफ्लेले बताए ।

धारिलो हतियार प्रहारबाट घाइते भएका समाज घिमिरेको मकवानपुर सहकारी अस्पतालको आईसीयूमा उपचार भइरहेको छ । उनको स्वास्थ्य अवस्था सुधारोन्मुख रहेको प्रहरीले जनाएको छ ।

घटनामा राजु घिमिरेसहित अन्य केही व्यक्तिको समेत संलग्नता हुन सक्ने आशंका गरिएको छ । उनीहरूको पहिचान तथा खोजी कार्य जारी रहेको प्रहरीले जनाएको छ ।