टीकापुर अस्पताल कुटपिट घटना: उपसमितिको निष्कर्ष– व्यक्तिगत मनमुटाब, अनुसन्धान जारी

धनगढी । कैलालीको टीकापुर अस्पतालमा फिजियोथेरापिस्ट अनिलकुमार तिवारीले प्रयोगशाला इन्चार्ज उमेशप्रसाद बजगाईँमाथि कुटपिट गरेको घटनाबारे गठित छानबिन उपसमितिले आफ्नो प्रतिवेदन अस्पताल व्यवस्थापन समितिका अध्यक्षसमक्ष बुझाएको छ ।

अस्पताल व्यवस्थापन समितिका सदस्य सुरेश रिमालको संयोजकत्वमा गठित उपसमितिले घटनाको अध्ययनपछि तयार गरेको प्रतिवेदनमा कुटपिट आरोपित तिवारी प्रहरी हिरासतमा रहेकाले उनको बयान लिन सम्भव नभएको उल्लेख गरेको छ । यता, प्रयोगशाला इन्चार्ज बजगाईँले अस्पताल प्रशासनमार्फत दिएको लिखित बयानमा प्रशासन शाखामा भएको विवादका क्रममा तिवारीले एक्कासि आफूमाथि हातपात गरेको बताएका छन् ।