सदनमा हलुका ढङ्गले प्रस्तुत नहुन बालेनलाई कांग्रेस महामन्त्रीको आग्रह

काठमाडौँ । नेपाली कांग्रेसका महामन्त्री प्रदीप पौडेलले मुलुकको सार्वभौमसत्ता र भौगोलिक अखण्डता जस्तो संवेदनशील विषयमा प्रधानमन्त्री बालेन शाहले गैरजिम्मेवार र हलुका टिप्पणी गरेको भन्दै गम्भीर ध्यानाकर्षण गराएका छन् ।

संसद्‌मा प्रधानमन्त्रीले दिएको जवाफप्रति असन्तुष्टि जनाउँदै महामन्त्री पौडेलले राष्ट्रको गरिमा र भूराजनीतिक संवेदनशीलतालाई ख्याल गर्न आग्रह गरेका हुन् ।

महामन्त्री पौडेलले नेपाल जस्तो संवेदनशील भूराजनीतिक अवस्थामा रहेको मुलुकको प्रधानमन्त्रीले कुनै पनि विषयमा विचार राख्दा अत्यन्त गहनताका साथ राख्नुपर्नेमा जोड दिएका छन् ।

‘सदनमा उपस्थित भएर जनताका प्रतिनिधिको जवाफ दिनु राम्रो अभ्यास भए तापनि भौगोलिक अखण्डता जस्तो गम्भीर विषयमा तयारीविना साधारण नागरिककै शैलीमा जवाफ दिँदा मुलुक नै अप्ठेरोमा पर्न सक्छ,’ पौडेलले आइतबार भने।

प्रधानमन्त्रीको प्रस्तुतिले देशको अन्तर्राष्ट्रिय गरिमामा आँच पुग्न सक्ने भन्दै पौडेलले आजको त्रुटिबाट गम्भीर पाठ लिन प्रधानमन्त्रीलाई सुझाव दिएका छन् । उनले आगामी दिनमा सार्वभौमसत्ता र भौगोलिक अखण्डताको विषयमा बोल्दा विषयको गम्भीरतालाई मनन गर्दै मुलुकको उच्च गरिमा कायम राख्ने गरी प्रस्तुत हुन प्रधानमन्त्रीको ध्यानाकर्षण गराएका छन्।

बालेनले आज संसद्‌मा सांसदहरूको प्रश्नको जवाफ दिँदै नेपालले पनि भारतको भूमि मिचेको भन्दै विवादास्पद अभिव्यक्ति दिएका थिए।