फिलिपिन्समा हिंस्रक अनलाइन गेम ‘गोरबक्स’ को प्रभावमा स्कुल गोलीकाण्ड भएको आशंका, एप प्रतिबन्धित

काठमाडौं । फिलिपिन्सले अनलाइन गेमिङ एप ‘गोरबक्स’ माथि अस्थायी प्रतिबन्ध लगाएको छ । गत सोमबार ट्याक्लोबान सहरको सान जोसे नेशनल हाई स्कुलमा तीन जना विद्यार्थीको ज्यान जाने र अन्य २० जना घाइते हुने गरी भएको एक दुर्लभ विद्यालय गोलीकाण्डको केही दिनपछि उक्त एपमा प्रतिबन्ध लगाएको हो । विद्यार्थीहरूमाथि गोली चलाएको आरोपमा कक्षाा ९ मा अध्ययनरत एक जना १४ र अर्का १५ वर्ष उमेरका किशोरहरूलाई पक्राउ गरिएको छ ।

अनुसन्धानकर्ताहरूले पक्राउ परेका मध्ये एक किशोरले नियमित रूपमा सो गेम खेल्ने गरेको पाएपछि फिलिपिन्स सरकारले अस्थायी रूपमा प्रतिबन्ध लगाउने घोषणा गरेको हो । उक्त गेममा खेलाडीहरूले विभिन्न हतियारहरू प्रयोग गर्न पाउनुका साथै यसमा अत्यधिक मात्रामा हिंसात्मक दृश्यहरू हुने गर्छन् ।