चक्रपथ दोस्रो खण्ड विस्तारः चार ठाउँमा अपांगमैत्री आकासेपुल

काठमाडौं । चीनले काठमाडौं चक्रपथको नयाँ बसपार्क खण्डमा भायाडक्ट बनाउने भएको छ । चीनको ५६ करोड ६० लाख युआन अनुदान र उसकै प्राविधिक सहयोगमा चक्रपथको कलंकीदेखि बसुन्धारा सम्मको ८.२ किलोमिटर खण्ड स्तरोन्नती गरिदैं छ । त्यसमा नयाँ बसपार्क खण्डमा भायाडक्ट अर्थात् फ्लाईओभर बनाइनेछ । यसको लम्बाइ झण्डै ६ सय मिटर हुनेछ । सम्भवतः यो नै नेपालको पहिलो भायाडक्ट हुनेछ ।

चक्रपथको पूर्व क्षेत्रबाट माछापोखरी चोक हुँदै उत्तरतर्फ आउजाउ गर्ने गाडीहरूलाई लक्षित गरेर भायाडक्ट (फ्लाईओभर) बनाइनेछ । यो विष्णुमती नदी र त्यसको पूर्व पश्चिमको सडक खण्ड माथि हुनेछ । पिल्लर नै बनाएर भायाडक्ट राखिनेछ ।

Advertisement

सडक विभागको टोली हालै चीन गएर चक्रपथ दोस्रो खण्डको प्रारम्भिक डिपीआर अध्ययन तथा स्वीकृति गरेर आएको छ । त्यसमा भायाडक्ट बनाउने उल्लेख छ ।

चार ठाउँमा अपांगमैत्री आकासेपुल

डिपीआर अनुसार चार ठाउँमा अपांगमैत्री आकासेपुल (ओभर हेड ब्रिज) निर्माण हुनेछ । सीतापाइला, ढुंगे धारा, बालाजु (गंगाहल) र बसुन्धारा मा यात्रुका लागि बाटो काट्न सहज हुने गरि आकासे पुल निर्माण गरिनेछ, जुन अपांगमैत्री हुनेछ । त्यसमा ह्वीलचियर, साइकल लगायतका साधारण पनि प्रयोग गर्न सकिनेछ ।

यस्तै, सडकका बीचमा भागमा हरियाली समेत बनाउने गरि डिजाइन गरिएको छ । अब चीन सरकारले उक्त डीपीआर फाइनल गरेर निर्माणका लागि ठेक्का आह्वान गर्नेछ । ठेकेदार छनोट गरेर चीनले निर्माण कार्य सुरु गर्न नेपाल पठाउनेछ । सडक विभागले दशैं पछि काम सुरु गर्न अनुरोध गरेको छ । त्यसमा चीनले सक्दो प्रयास गर्ने जवाफ दिएको सडक विभागका एक उच्च अधिकारीले बताए ।

२७ किलोमिटर लामो काठमाडौं चक्रपथ पहिलो पटक सन् १९७७ मा चीनकै अनुदानमा निर्माण गरिएको थियो । अहिले चीनकै अनुदानमा यसको विस्तार गरिदैं छ । त्यसमा कोटेश्वर–एकान्तकुना–कलंकी खण्ड २०७५ सालमै विस्तार भइसकेको छ ।

दोस्रो खण्डका लागि सोही बर्ष चीनसँग सम्झौता भएको थियो । तर, कोरोना महामारी लगायतका कारण त्यसमा विलम्ब हुँदै आएको थियो । सम्झौता गरेको झण्डै आठ बर्षमा चीनले दोस्रो खण्डमा काम गर्दैछ । पहिला कलंकीदेखि धोबीखोलासम्मको ११.६ किमी खण्ड विस्तार गर्ने भनिएको थियो ।

नारायण गोपाल चोक क्षेत्रमा जग्गा प्राप्तिमा समस्या भएपछि ८.२ किमी लामो कलंकी–वसुन्धारा खण्डलाई मात्रै विस्तार गरिदैं छ । यसमा ६२ मिटर चौडाइको सडक हुनेछ । त्यसमा बीचमा तीन मिटरको खाली ठाउँ राखेर हरियाली विकास गरिनेछ । त्यसको दायाँ बायाँ चार चार लेनको सडक निर्माण गरिनेछ । त्यसपछि सर्भिस लेन, फुटपाथ लगायतका संरचना पनि बनाइने छ ।