धनगढीमा खानेपानी संकट, स्याउलेमा दमकल र ट्यांकरबाट पानी वितरण

धनगढी । मनसुन सक्रिय नहुँदा कैलालीलगायतका क्षेत्रमा खडेरी लम्बिँदै गएपछि भूमिगत पानीको सतह तीव्र रूपमा घट्न थालेको छ । पानीको सतह घटेसँगै धनगढीका अधिकांश हातेपम्प सुकेका छन् भने खानेपानी र सिँचाइ दुवै क्षेत्रमा संकट देखिएको छ ।

भूमिगत जलस्रोत तथा सिंचाई विकास डिभिजन कैलालीका अनुसार भूमिगत पानीको अत्यधिक दोहन, वन फडानी, चुरे९भावर क्षेत्रमा नदीजन्य पदार्थको अत्यधिक उत्खन, कंक्रिट भवन र कालोपत्रे सडकका कारण जमिनमा पानी पुनर्भरण हुन नपाउँदा धनगढी क्षेत्रमा पानीको सतह लगातार घट्दै गएको हो ।