बुटवल उपमहानगरपालिकाले ल्यायो ४ अर्बको बजेट

बुटवल उपमहानगरपालिकाले आगामी आर्थिक वर्ष २०८३/०८४ का लागि झण्डै चार अर्ब रुपैयाँ बराबरको बजेट सार्वजनिक गरेको छ ।

नगर उपप्रमुख सावित्रादेवी अर्यालले बुधबार ३ अर्ब ९९ करोड २२ लाख २१ हजार २०० रुपैयाँको अनुमानित आय/व्यय प्रस्तुत गरेकी हुन् । जसमध्ये चालुतर्फ ५२ र पुँजीगततर्फ ४८ प्रतिशत रहेको छ । यो बजेट चालु आर्थिक वर्षको भन्दा अंकमा ६३ करोडले बढी हो ।

चालु आवमा २०८२/०८३ का लागि ३ अर्ब ३६ करोड १३ लाख बराबरको बजेट ल्याएको थियो । बजेटमा शिक्षा, स्वास्थ्य, रोजगार, पर्यटन र कृषिलाई प्राथमिकता दिइएको छ ।

'समानता, स्वाभिमान र अवसर–बस्नयोग्य बुटवल शहर' भन्ने नारालाई आत्मसात गर्दै ल्याइएको प्रस्तावित बजेटको व्यय अनुमानअनुसार सामाजिक विकासतर्फ २८ प्रतिशत र आर्थिक विकासतर्फ १२ प्रतिशत बजेट विनियोजन गरिएको छ ।

त्यस्तै पूर्वाधार विकासतर्फ ५५ प्रतिशत, सुशासन तथा अन्तरसम्बन्धित क्षेत्रतर्फ ५ प्रतिशत विनियोजन गरिएको छ ।

बजेटको स्रोत व्यवस्थापनका लागि संघीय सरकारबाट संघीय समानीकरण अनुदानबापत २९ करोड २२ लाख, ससर्त अनुदान (चालु) तर्फ ५० करोड २५ लाख, ससर्त अनुदान (पुँजीगत) तर्फ ७ करोड ४ लाख, विशेष अनुदान (पुँजीगत) तर्फ ९० लाख र समपूरक अनुदान (पुँजीगत) तर्फ २० लाख प्राप्त हुने अनुमान छ ।

यस्तै, प्रदेश सरकारबाट प्रदेश समानीकरण अनुदानबापत २ करोड ३ लाख ६५ हजार, सशर्त अनुदान (चालु) तर्फ ५६ लाख ५० हजार, सशर्त अनुदान (पुँजीगत) तर्फ १ करोड ७३ लाख, समपूरक अनुदान (पुँजीगत) बापत १ करोड ५० लाख र विशेष अनुदान (पुँजीगत) तर्फ २० लाख प्राप्त हुने प्रक्षेपण गरिएको छ ।

राजस्व बाँडफाँटतर्फ संघीय सरकारबाट १९ करोड ४३ लाख ८६ हजार र प्रदेश सरकारबाट २ करोड ७५ लाख ६१ हजार प्राप्त हुने अनुमान छ ।

नगरको आन्तरिक स्रोत व्यवस्थापनतर्फ स्थानीय आन्तरिक स्रोतबापत १ अर्ब ५० करोड ३८ लाख ५९ हजार २ सय संकलन हुने लक्ष्य राखिएको छ ।

यसबाहेक स्थानीय राजस्व बाँडफाँटअन्तर्गत विज्ञापन, मनोरञ्जन कर र दहतर बहत्तरको बिक्रीबाट ७८ करोड ७७ लाख ७८ हजार ८ सय प्राप्त हुने तथा गत आर्थिक वर्षको बचत (अल्या) ४० करोड गरी कुल स्रोत ३ अर्ब ८५ करोड रहने अनुमान गरिएको छ ।