नेपाल आयल निगमको ट्यांकरबाट ७७३ लिटर पेट्रोल चोरी, अनुसन्धानपछि तथ्य सार्वजनिक

विराटनगर– नेपाल आयल निगम लिमिटेड, कोशी प्रादेशिक कार्यालय विराटनगरले आफ्नो डिपोमा आएको पेट्रोल बोकेको ट्यांकरबाट ७७३ लिटर पेट्रोल चोरी भएको पुष्टि गरेको छ । निगमले बुधवार जारी गरेको प्रेस विज्ञप्तिमार्फत घटनाबारे विस्तृत जानकारी सार्वजनिक गरेको हो ।

निगमका अनुसार श्री नवीन ढुवानी सेवा प्रालिको ट्यांकर ९को १ ख ६१९०० ले भारतीय आयल कर्पोरेसनको सिलिगुडी डिपोबाट २० हजार लिटर पेट्रोल लोड गरी असार ७ गते बिहान करिब ५ बजे विराटनगरस्थित निगमको डिपो परिसरमा प्रवेश गरेको थियो । तर असार ८ गते बिहान ९ बजे उक्त ट्यांकर पार्किङस्थलबाट हराएको जानकारी ढुवानीकर्ताले निगमलाई दिएका थिए ।

घटनापछि नेपाल आयल निगमले जिल्ला प्रहरी कार्यालय मोरङलाई लिखित जानकारी गराउँदै अनुसन्धान अघि बढाएको थियो । सीसीटीभी फुटेजको अध्ययन गर्दा ट्यांकर असार ८ गते बिहान ३स्०३ बजे पार्किङ स्थलबाट बाहिरिएको र नोबेल अस्पतालतर्फ गएको देखिएको निगमले जनाएको छ ।

निगम, प्रहरी तथा ढुवानीकर्ताको संयुक्त खोजी अभियानका क्रममा करिब १७ किलोमिटर टाढा सुनसरी जिल्लाको भोक्राहा नरसिंह गाउँपालिका–८ स्थित हुलाकी राजमार्ग क्षेत्रमा ट्यांकर फेला परेको थियो । फेला पर्दा ट्यांकरको सिल र ताल्चा काटिएको अवस्थामा रहेको बताइएको छ । त्यसपछि प्रहरीले आवश्यक मुचुल्का तयार गरी थप अनुसन्धानका लागि प्रक्रिया अघि बढाएको थियो ।

बुधवार दिउँसो मोरङका प्रमुख जिल्ला अधिकारी, जिल्ला प्रहरी कार्यालय मोरङ, सञ्चारकर्मी, निगम तथा ढुवानीकर्ताका प्रतिनिधिहरूको उपस्थितिमा ट्यांकरको सिल खोली गुणस्तर तथा परिमाण परीक्षण गरिएको थियो । परीक्षणका क्रममा २० हजार लिटरमध्ये ७७३ लिटर पेट्रोल कम रहेको पुष्टि भएको निगमले जनाएको छ । बाँकी १९,०२७ लिटर पेट्रोल निगमको भण्डारणमा खन्याइएको छ ।

निगमका अनुसार पेट्रोलको गुणस्तर भने मापदण्डअनुसार नै रहेको पाइएको छ । साथै, पेट्रोलियम पदार्थ ढुवानी विनियमावली–२०७३ अनुसार चोरी भएको परिमाणको दोब्बर रकम ढुवानीकर्ताबाट असुल गरिएको जानकारी पनि निगमले दिएको छ ।

यस घटनासम्बन्धी केही सञ्चारमाध्यम तथा सामाजिक सञ्जालमा आधारहीन र तथ्यहीन समाचारहरू प्रकाशित भएको भन्दै निगमले आपत्ति जनाएको छ । निगमले आधिकारिक जानकारीबाहेकका समाचारमा विश्वास नगर्न तथा सम्बन्धित सरकारी निकायबाट अनुसन्धान जारी रहेको जनाएको छ । घटनाबारे थप अनुसन्धान भइरहेको प्रहरीले जनाएको छ ।