याक्चे र निगुरो बेचेर पढाइ खर्च जुटाउँदै पातारासीका बालबालिका

जुम्लाको पातारासी गाउँपालिका–३ तल्फी गाउँका बालबालिकाले लेकाली क्षेत्रमा पाइने याक्चे (चुक) र निगुरो बेचेर आफ्नो पढाइ खर्च जुटाउने गरेका छन्। बिदाको समय सदुपयोग गर्दै उनीहरू वन क्षेत्रबाट याक्चे र निगुरो संकलन गरी सदरमुकाम खलंगामा बिक्री गर्न पुग्छन्।

गाउँबाट करिब चार घण्टा टाढाको पाटन क्षेत्रबाट याक्चे संकलन गर्दै आएका १२ वर्षीय रमित बोहराले आफूजस्तै धेरै साथीहरूले चुक बेचेर कापी–कलमदेखि अन्य शैक्षिक सामग्रीसम्मको खर्च जुटाउने गरेको बताए। आर्थिक अवस्था कमजोर भएका परिवारका बालबालिकाका लागि याक्चे र निगुरो अतिरिक्त आम्दानीको स्रोत बनेको छ।