इरानी विदेशमन्त्री अराची र हमास अधिकारीबिच भेटवार्ता

इरानका विदेशमन्त्री अब्बास अराघचीले प्यालेस्टिनी लडाकू समूह हमासका एक वरिष्ठ अधिकारीसँग इरान र संयुक्त राज्य अमेरिकाबिचको वार्ताको बारेमा भेटवार्ता गरेको इरानको सरकारी टेलिभिजनले बुधबार जनाएको छ ।

अब्बास अराघचीले हमासको राजनीतिक ब्युरोका सदस्य बासेम नइमसँग यस क्षेत्रको पछिल्लो घटनाक्रमबारेमा छलफल गरेको इरानी टेलिभिजनले जनाएको हो । मध्यपूर्वमा व्याप्त शत्रुता अन्त्य गर्ने उद्देश्यले इरान र संयुक्त राज्य अमेरिकाबिच गत हप्ता समझदारी पत्रमा हस्ताक्षर भएको थियो ।

समझदारी पत्रमा गाजाको बारेमा स्पष्ट व्यवस्था नगरिएको भएता पनि लेबनान लगायतका क्षेत्रमा जारी सैन्य कारबाहीको तत्काल र स्थायी समाप्ति निर्धारित गरिएको छ । हमासले उक्त सम्झौताको स्वागत गर्दैे इजरायलसँगको दुई वर्ष भन्दा लामो युद्धबाट ध्वस्त भएको गाजा पट्टीमा हिंसा अन्त्य गर्न आवाश्यक सहयोग गर्ने आशा व्यक्त गरेको छ ।

इरान प्यालेस्टिनी जनताको कट्टर समर्थक हो, जसले यसलाई सन् १९७९ को इस्लामिक क्रान्तिपछि आफ्नो विदेश नीतिको आधारशिला बनाएको छ । इरानी टेलिभिजनको रिपोर्टअनुसार, छलफलको क्रममा, अराघचीले प्यालेस्टिनीका लागि इस्लामिक गणतन्त्रको निरन्तर समर्थन र उनीहरूको स्वतन्त्र राष्ट्रिय अधिकार पूर्णरूपमा साकार नभएसम्म उनीहरूको न्याय नहुने बताउनुभएको छ ।

तेहरान र वासिङ्टनबिच भएकोे वार्तामा मध्यस्थकर्ताको रूपमा भुमिका निर्वाह गर्दै आएको छिमेकी राष्ट्र पाकिस्तानको भ्रमणमा मङ्गलबार इरानी विदेशमन्त्री अराघची र राष्ट्रपति मसूद पेजेस्कियनसँगै गएको जनाइएको छ । रासस/एएफपी